Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 323 Hüküm no: 295 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ömer’in varislerinin alacak davasında anlaşma sağlanması Vilâyet-i Rumeli’nde Şakluş? kasabası ahâlîsinden iken bundan akdem fevt olan Ömer b. Ahmed nâm kimesnenin verâseti zevce-i metrûkesi Fâtıma bt. Abdullah nâm hatun ile sulbî kebîr oğlu Ahmed’e ve kebîre kızı Âişe’ye münhasıra olduğu zâhir ve müte‘ayyin oldukdan sonra mezbûr Ahmed kendi tarafından asâleten ve kız karındaşı Âişe tarafından husûs-ı âti’l-beyana sâbitü’l-vekâle vekîli olmağla vekâleten mahmiye-i İstanbul’da meclis-i şer‘-i enverde hâlâ Rumeli kādıaskeri kapısında muhzırbaşı olan bâ‘isü’l-vesîka Mehmed Ağa b. Osman nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip babamız mezbûr Ömer fevt oldukda kasaba-i mezbûrede vâki‘ ma‘lûmü’l-hudûd ve’l-kıt‘a bağ ve bahçesini [75b] mezbûr Mehmed Ağa’nın babası ve müteveffâ-yı mezbûrun karındaşı olan mezbûr Osman bi-gayrı hakkın zabt ve tasarruf edip ba‘dehû mezbûr Osman fevt oldukda zikr olunan bağ ve bahçe oğlu mezbûr Mehmed Ağa’nın zabt ve tasarrufunda olup on senelik mahsûlünü dahi ahz u kabz eyledin deyü mezbûr Mehmed Ağa’dan zikr olunan bağ ve bahçe ile on senelik mahsûlât için elli guruş taleb ve da‘vâ eyledikde nizâ‘-ı küllî vukū‘undan sonra el-hâletü hâzihi da‘vâ-i mezkûremden merkūm Mehmed Ağa benimle an-inkâr altı buçuk guruş üzerine akd-i musâlaha eyledikden sonra ben dahi sulh-ı mezbûru kabûl ve bedel-i sulh olan meblağ-ı mezbûru mezbûr Mehmed Ağa yedinden asâlet ve vekâletim hasebiyle alıp kabz edip müteveffâ-yı mezbûrun terekesine ve husûs-ı mezbûra müte‘allıka da‘vâdan mezbûr Mehmed Ağa’nın zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fî 16 min-şehri Rebî‘ülâhir sene 1116. Şuhûdü’l-hâl: Veliyüddin Efendi el-kādı, Osman Çelebi b. Ali, Mehmed Efendi kâtib, Ahmed Çelebi b. Mustafa, Hasan Çelebi b. Sandıkçı, el-Hâc Mustafa muhzır, Ali Çelebi muhzır, Ahmed Çelebi muhzır, Abdurrahman Çelebi muhzır.