Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 324 Hüküm no: 296 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Mehmed’in Marat v. Donik aleyhinde ikame ettiği menzil davasının reddedilmesi Vilâyet-i Rumeli’nde medîne-i Malkara mahâllâtından Tahtamescid mahâllesi sâkinelerinden olup mahmiye-i İstanbul’da müsâfiren sâkine İsmihan bt. Mehmed nâm hatun mahmiye-i mezbûrede meclis-i şer‘de medîne-i mezbûre ahâlîsinden işbu râfi‘ü’s-sifr Marat v. Donik nâm zimmî muvâcehesinde üzerine da‘vâ ve takrîr-i kelâm edip mahâlle-i mezbûrede vâki‘ bir tarafdan el-Hâc Ali nâm kimesne mülkü ve bir tarafdan Hasan b. Bayram mülkü ve bir tarafdan Ali nâm kimesne mülkü ve bir tarafdan tarîk-i âm ile mahdûd iki bâb tahtânî oda ve sundurma ve bi’r-i mâ ve bahçe ve bir mikdâr havluyu müştemil mülk menzil târîh-i kitâbdan bir ay mukaddem zevcem gāib ani’l-meclis Osman nâm kimesneden kırk beş guruş semen-i makbûza iştirâ etmekle ol vechile yedimde mülküm iken menzil-i mahdûd-ı mezbûru merkūm Marat medîne-i mezbûrede Musa nâm kimesneye bey‘ ve teslîm etmekle hâlâ menzil-i mahdûd-ı mezbûru merkūm Marat’dan taleb ederim suâl olunsun dedikde müdde‘iye-i mezbûre İsmihan’ın ber-vech-i meşrûh takrîri üzere menzil-i mahdûd-ı mezkûra vâzı‘ü’l-yed olan âhar olmağla merkūm Marat hasm-ı şer‘î olmayıp suâl dahi teveccüh etmemeğin müdde‘iye-i mezbûre İsmihan bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: Mehmed Çavuş b. Mustafa, İsmail Efendi kâtib, Ömer Efendi kâtib, Mehmed Efendi kâtib, el-Hâc Yusuf muhzır.