Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 325 Hüküm no: 298 Orijinal metin no: [75b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. Dona’nın at bedelinden Malkas v. Nikos’da olan alacağını tahsil etmesi Mahmiye-i İstanbul’da Kumkapı kurbünde sâkin Sava v. Dona nâm zimmî mahmiye-i mezbûrede meclis-i şer‘de vilâyet-i Rumeli’nde Malkara kasabasında sâkin işbu râfi‘ü’l-vesîka Malkas v. Nikos nâm zimmî muvâcehesinde üzerine da‘vâ ve takrîr-i kelâm [edip] merkūm Malkas kasaba-i mezbûrede hancı olmağla bundan akdem yüz guruş kıymetli bir re’s kula atımı merkūm Malkas’a bi-tarîkı’l-emâne def‘ ü teslîm, ol dahi yedimden ahz u kabz etmekle hâlâ suâl olunup zikr olunan atın aynı mevcûd ise aynını müstehlek ise kıymet-i şer‘iyyesini alıvermek matlûbumdur dedikde gıbbe’s-suâl merkūm Malkas cevâbında fi’l-hakīka müdde‘î-i mezbûrun ber-vech-i muharrer yedinden bir re’s kula bargir kabz eylediğini ikrâr lâkin müdde‘î-i mezbûr âhar yere gider oldukda yüz güne değin gelmez isem zikr olunan atımı semen-i misline âhara bey‘ ve kabz-ı semene tarafından beni vekîl etmekle ben dahi ba‘de’l-kabûl müddet-i mezkûre mürûr edip müdde‘î-i merkūm gelmemekle ben dahi vekâletime binâen mârrü’z-zikr atı sûk-ı sultânîde ba‘de’l-müzâyede ve inkıtā‘i’r-rağabe on sekiz guruşda karâr ve semen-i misli olmak üzere [76a] on sekiz guruşa âhara bey‘ ve kabz-ı semen etmiş idim deyü def‘le mukābele edicek gıbbe’l-istintâk ve’l-inkâr merkūm Malkas’dan def‘-i mezkûrunu mübeyyine beyyine taleb olundukda kasaba-i mezbûrede Acı İsrail mahâllesi sükkânından Kiracı Marat v. Donik ve mahmiye-i mezbûrede Topkapısı’nda sâkin Arakil v. Ferhat nâm Ermeniler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka müdde‘î-i mezbûr Sava v. Dona bundan akdem âhar yere gider oldukda zikr olunan kula atını mesfûr Malkas zimmîye ber-vech-i muharrer def‘ ve teslîm ol dahi yedinden ahz u kabz etdiğinden sonra eğer ben müddet-i mezbûreye değin gelmez isem mârrü’z-zikr atımı semen-i misline âhara bey‘ ve kabz-ı semene mesfûr Malkas tarafından vekîl etmekle ol dahi ba‘de’l-kabûl müddet-i mezkûre mürûr edip müdde‘î-i mezbûr gelmemekle zikr olunan atı sûk-ı sultânîde ba‘de’l-müzâyede ve inkıtâ‘ı’r-rağbe on sekiz guruşda karâr edip bizim huzûrumuzda müdde‘î-i mezbûr Malkas zikr olunan atı semen-i misli ile olmak üzere on sekiz guruşa âhara bey‘ ve kabz-ı semen eyledi, biz bu husûsa bu vech- üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de-ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcebince ba‘de’l-hükm meblağ-ı mezbûr on sekiz guruşu müdde‘î-i mezbûra teslîme merkūm Malkas’a tenbîh olunup ziyâde mutâlebesinden bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: Mehmed Efendi b. Said, Sandalcızâde İsmail Efendi, Mehmed Efendi el-kâtib, Mehmed Çavuş b. Mustafa, el-Hâc Osman tâbi‘-i hazret efendi, Osman Bey b. Abdullah Malkara’dan, el-Hâc Yusuf.