Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 326 Hüküm no: 299 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin İsmail Çelebi aleyhindeki alacak davasının reddedilmesi Mahmiye-i İstanbul’da Ayasofya-i kebîr kurbünde sâkin Hasan Çelebi b. Abdullah nâm kimesne mahmiye-i mezbûrede meclis-i şer‘de işbu bâ‘isü’l-kitâb İsmail Çelebi b. Mehmed mahzarında üzerine da‘vâ ve takrîr-i kelâm edip mezbûr İsmail Çelebi zimmetinde cihet-i deyn-i şer‘îden yirmi sekiz buçuk guruş ile kıymetleri beynimizde ma‘lûm sîm bir ön kuşak ve beynimizde vasfı ma‘lûm bir kerrâkem olmağla hâlâ meblağ-ı mezbûr yirmi sekiz buçuk guruş ile zikr olunan kuşağı ve kerrâkeyi mezbûr İsmail Çelebi’den taleb ederim, suâl olunsun dedikde gıbbe’s-suâl mezbûr İsmail Çelebi cevâbında zikr olunan yirmi sekiz guruşu inkâr eylediğinden mâ‘adâ müdde‘î-i mezbûrun ancak yedimde bir sîm kuşak ile bir kerrâkesi olmağla târîh-i kitâbdan yirmi gün mukaddem zikr olunan kuşak ile kerrâkeyi şuhûd mahzarında kendüye def‘ ü teslîm, ol dahi ahz u kabz edip meblağ-ı mezbûr yirmi sekiz buçuk guruşa ve sâir hukūka müte‘allıka da‘vâdan benim zimmetimi ibrâ ve iskāt etmişdi deyü def‘le mukābele edicek gıbbe’l-istintâk ve akībe’l-inkâr mezbûr İsmail Çelebi’den def‘-i mezkûruna beyyine taleb olundukda udûl-i Müslimînden Üskübî mahâllesinde sâkin Mehmed Çelebi b. Abdullah ve Haraççı Kara Mehmed mahâllesinden el-Hâc Osman b. el-Hâc Mehmed nâm kimesneler li-ecli’ş-şehâde meclis-i şer‘de hâzırân olup istişhâd olunduklarında fi’l-hakīka târîh-i mezbûrda mezbûr İsmail Çelebi bizim huzûrumuzda zikr olunan kuşak ile kerrâke-i mezkûreyi müdde‘î-i mezbûr Hasan Çelebi’ye def‘ ü teslîm ol dahi ahz u kabz eyledikden sonra meblağ-ı mezbûr yirmi sekiz buçuk guruşa ve sâir hukūka müte‘allıka âmme-i da‘vâdan mezbûr İsmail Çelebi’nin zimmetini ibrâ ve iskāt eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr bî-vech mu‘ârazadan men‘ birle mâ-vaka‘a bi’t-taleb ketb olundu. Fî 18 min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Yusuf Çavuş b. Hasan, Mehmed Çavuş b. Mustafa, Hüseyin Efendi el-kādı, Ömer Efendi el-kādı, el-Hâc Yusuf b. Osman, Yusuf Çelebi b. Abdullah, Veliyüddin Efendi el-kādı.