Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 329 Hüküm no: 301 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Maçik’in, Yorgi v. Manolaki aleyhindeki dükkân davasının reddedilmesi Bâ-imzâ-i hazret efendi Havâss-ı refî‘a kazâsı muzâfâtından Çatalca kasabası ahâlîsinden <> Todori v. Maçik nâm zimmî mahmiye-i İstanbul’da meclis-i şer‘de Mahmudpaşa Evkāfı mütevellîsi vekîli Ahmed Ağa hâzır olduğu hâlde yine kasaba-i merkūme ahâlîsinden işbu râfi‘ü’s-sifr Yorgi v. Manolaki nâm zimmî muvâcehesinde üzerine da‘vâ ve takrîr-i kelâm edip evkāf-ı merkūme musakkafâtından kasaba-i mezbûrede vâki‘ bir tarafdan Kapan ve etrâf-ı selâseden tarîk-i âm ile mahdûd iki bâb abacı ve bir bâb bakkāl dükkânlarını işbu yedimde olan mütevellî temessükü mantûkunca izn-i mütevellî ve icâreteyn-i ma‘lûmeteyn ile benim tasarrufumda iken mezbûr Yorgi zikr olunan dükkânlara bi-gayrı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl merkūm Yorgi cevâbında fi’l-vâki‘ zikr olunan dükkânlara vaz‘-ı yedini ikrâr, lâkin zikr olunan dükkânların arsası evkāf-ı mezbûreden senede üç yüz akçe mukāta‘a ile babam merkūm Manolaki’nin tasarrufunda ve binâsı mülkü olup ba‘de-helâkihi ebniye-i merkūme ırsen bana isâbet ve intikāl edip babam hâlik-i merkūmun hîn-i helâkinde ben sagīr bulunmağla zikr olunan dükkânların arsa ve binâsı vakıf olmak zu‘muyla dekâkîn-i merkūme taraf-ı vakıfdan Kostaneti nâm zimmîye ve onun ferâğından Susanna’ya onun dahi ferâğından târîh-i kitâbdan on bir sene mukaddem işbu merkūm Todori’ye icâr olunup hattâ ben yedimde olan işbu hüccet-i şer‘iyye mûcebince zikr olunan dükkânların arsası defter-i evkāfda mukāta‘a-i mezbûre ile babam hâlik-i merkūmun üzerinde mastûr ve mukayyed olup ve binâları mülkü olmağla terekesinden olup ba‘de-helâkihi ırsen bana isâbet ve intikāl eylediği Çatalca nâhiyesinde bi’l-fi‘il nâibü’ş-şer‘ olan Mevlânâ Mehmed Efendi huzûrunda merkūm Todori muvâcehesinde vech-i şer‘î üzere ba‘de’l-isbât mûcebince nâib-i mezbûr dekâkîn-i merkūmeyi bana hükm ve dekâkîn-i merkūmeden merkūm Todori’nin kasr-ı yedine tenbîh birle yedime hüccet-i şer‘iyye dahi [vermiş idi] bi-hakkın vaz‘-ı yed ederim deyü def‘le mukābele edicek ve nâib-i mezbûrun imzâ ve hatemini hâviye ve târîh-i kitâb senesi Rebî‘u’l-evveli’nin yirmi yedinci günüyle müverraha bir kıt‘a hüccet ibrâz edip mazmûnu min-külli’l-vücûh merkūm Yorgi’nin takrîr-i meşrûhunu nâtık bulunmağın gıbbe’l-istintâk merkūm Todori mazmûn-ı hücceti inkâr etmeğin merkūm Yorgi’den mazmûn-ı hüccete beyyine taleb olundukda zeylinde mastûr olan cemâ‘at-i Müslimînden İmam Seyyid Ahmed Efendi b. ( ) ve Mehmed Çelebi b. el-Hâc Hasan li-ecli’ş-şehâde hâzırân olup isre’l-istişhâd fi’l-vâki‘ işbu merkūm Yor[gi] kasaba-i Çatalca’da vâki‘ bir tarafdan Kapan ve etrâf-ı selâsesi tarîk-i âm ile mahdûd iki bâb abacı dükkânı ve bir bâb bakkāl dükkânlarının arsası senede üç yüz akçe mukāta‘a ile babası hâlik-i mezbûr Manolaki’nin üzerinde olduğu defter-i vakıfda mastûr ve mukayyed ve binâları mülkü olmağla terekesinden olup ba‘de-helâkihi ırsen kendüye isâbet ve intikāl eylediğini Çatalca nâhiyesinde nâibü’ş-şer‘ olan Mehmed Efendi huzûrunda vakf-ı mezbûr mütevellîsi kāimmakāmı hâzır olduğu hâlde işbu merkūm Todori muvâcehesinde vech-i şer‘î üzere ba‘de’l-isbât mûcebince nâib-i mezbûr dekâkîn-i merkūmeyi <> merkūm Yorgi’ye hükm ve dekâkîn-i mezkûreden mezbûr Todori’nin kasr-ı yedine tenbîh birle merkūm Yorgi yedine işbu hücceti verdi, biz mazmûn-ı hüccet-i mezbûreye bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘î-i merkūm Todori bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Ali Efendi b. Abdurrahman, Mustafa Efendi b. Ali, Ali Efendi b. Ahmed, İbrahim Efendi b. Abdülbaki, el-Hâc Osman b. İsmail, el-Hâc Yusuf b. Osman.