Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 331 Hüküm no: 303 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşkinci Hamza Bali Muallimhanesi mütevellisi Saliha Hatun’un İsmail b. Mehmed’i vekil tayin etmesi Mahmiye-i İstanbul’da Pirinçcisinan mahâllesinde vâki‘ ashâb-ı hayrâtdan merhûm Eşkinci Hamza Bâli Muallimhânesi’nin evlâdiyet ve meşrûtiyet üzere bi’l-fi‘il mütevellîsi olup zâtı Mustafa Efendi b. Mehmed ve Ahmed Ağa b. Abdullah nâm kimesneler ta‘rîfleriyle mu‘arrefe olan Saliha Hatun bt. Mehmed Efendi mahmiye-i mezbûrede meclis-i şer‘de işbu râfi‘ü’l-vesîka Seyyid İsmail b. Seyyid Mehmed nâm kimesne mahzarında bi’t-tevliye ikrâr ve takrîr-i kelâm edip ben nisâ tâifesinden olup her bâr taşraya çıkıp umûr-ı vakfı rü’yetden âcize olduğum cihetle ba‘de’l-yevm mütevellîyesi olduğum vakf-ı mezbûrun bi’l-cümle umûrunu görmek üzere tarafımdan mezbûr Seyyid İsmail’i vekîl ve nâ[ib-i] menâb nasb u ta‘yîn eylediğimde ol dahi vekâlet-i mezbûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 min-şehri Rebî‘ülâhir sene 1116. Şuhûdü’l-hâl: Mustafa Efendi b. Mehmed kâtib-i vakf, es-Seyyid Abdurrahim, Ahmed Ağa b. Mehmed, Mehmed Çelebi b. ( ).