Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 332 Hüküm no: 304 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Ali’nin Dergâh-ı Ali Yeniçerilerinin 87. Cemaat Neferatı Vakfı’ndan borç alması Mahmiye-i İstanbul’da Kâtib Hüsrev mahâllesinde sâkine Afife bt. Ali nâm Hatun’un zevci ve tarafından husûs-ı âti’l-beyana vekîli olduğu zât-ı mezbûre[yi] ma‘rifet-i şer‘iyye ile ârifân İmam Mehmed Efendi b. Mustafa ve Molla Ahmed b. Mehmed nâm kimesneler şehâdetleriyle sâbit olan Mehmed Çelebi b. Ali nâm kimesne mahmiye-i mezbûrede meclis-i şer‘-i hatîrde Dergâh-ı âlî yeniçerilerinin seksen yedi cemâ‘atine mahsûs oda neferâtı mühimmâtı için mevkūfe nukūda mütevellî olan bâ‘isü’l-kitâb İbrahim Beşe b. Mahmud nâm kimesne mahzarında bi’l-vekâle ikrâr ve takrîr-i kelâm edip zevcem müvekkile-i mezbûre akd-i âti’z-zikrin sudûruna değin yedimde mülk ve hakkım olup mahâlle-i mezbûrede vâki‘ bir tarafdan Hızır Bey Vakfı’ndan olup Bekdaş nâm kimesne tasarrufunda olan menzil ve bir tarafdan Haremeyn-i şerîfeyn Vakfı olup Âişe Hatun tasarrufunda olan menzil ve bir tarafdan el-Hâc Halil nâm kimesne menzili ve bir tarafdan tarîk-i âm ile mahdûd fevkānî ve tahtânî odayı ve kârgîr mahzen ve su kuyusunu müştemil olan mülk menzilini târîh-i kitâb senesi Rebî‘ülevveli gurresinden cümle tevâbi‘i ile bi-tarîkı’l-istiğlâl mütevellî-i mezbûra yüz guruşa bey‘ ve teslîm ol dahi [78a] ber-vech-i muharrer iştirâ ve tesellüm ve kabûl edip semeni olan meblağ-ı mezbûr yüz guruşu mütevellî-i mezbûr yedinde olan mâl-ı vakf-ı mezbûrdan zevcem müvekkile-i mezbûreye tamâmen def‘ ü teslîm ol dahi yedinden ahz u kabz eylediğinden sonra mütevellî-i mezbûr yine menzil-i mezbûru ba‘de’t-tahliyeti’ş-şer‘iyye ve’t-takâbüzu’l-mer‘iye gurre-i mezbûreden bir sene tamâmına değin on guruşa müvekkile-i mezbûreye icâr ve teslîm, ol dahi isticâr ve tesellüm eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Mehmed Beşe b. Hüseyin, Ahmed Beşe b. Yusuf, el-Hâc Yusuf b. Osman, Mustafa Efendi el-kādî, Veliyüddin Efendi el-kâtib.