Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 332 Hüküm no: 305 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın eşi Ali’den muhalaa usulüyle boşanması Mahmiye-i İstanbul’da Pirinçcisinan mahâllesi sâkinelerinden Fâtıma bt. Mustafa nâm hatunun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘de zevc-i muhâlı‘ı işbu râfi‘atü’l-kitâb Ali b. Abdullah nâm kimesne mahzarında ikrâr ve takrîr-i kelâm edip zevcim mezbûr Ali ile beynimizde hüsn-i mu‘âşeretimiz olmamağla mezbûrun firâşından hâsıl ve benden mütevellid olup bi-hakkı’l-hıdâne hacr ve terbiyemde olan işbu sagīr oğlum Mehmed’i rızâm ile babası mezbûra teslîm eylediğimden sonra zimmetinde mütekarrir ve ma‘kūdün-aleyh olan iki yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim merkūm Ali ile muhâla‘a-i sahîha-i şer‘iyye ile muhâla‘a olduğumda ol dahi hul‘-ı mezbûru ba‘de’l-kabûl <> zevcim mezbûr zimmetinde cihet-i deyn-i şer‘îden beş yüz guruş hakkım olmağla hâlâ meblağ-ı mezbûru bana edâya iktidârı olmayıp tecîle tâlib olmağın târîh-i kitâbdan beher şehr yarımşar guruş edâ ve teslîm etmek üzere tecîl eylediğimde ol dahi ber-vech-i muharrer kabûl ve edâya ta‘ahhüd etdikden sonra hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Şaban Efendi kādî, Mehmed Efendi kâtib, el-Hâc İbrahim b. Abdullah, Mustafa b. Abdullah, Sandalcı Mehmed Çelebi b. ( ), es-Seyyid Hüseyin Çelebi b. ( )