Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 333 Hüküm no: 306 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimitri’nin eşi Lebana’yı muhalaa usulüyle boşaması ve aralarındaki alacak davasında anlaşma sağlanması Mahmiye-i İstanbul’da Eğrikapı dâhilinde Avcıbey mahâllesinde sâkin bakkāl tâifesinden Yorgi v. Dimitri nâm zimmî mahmiye-i mezbûrede meclis-i şer‘de zevce-i sâbıkāsı râfi‘atü’l-vesîka Lebana bt. Yorgi nâm Nasrâniyye tarafından husûs-ı âti’l-beyana vekîl-i şer‘îsi olan vâlidesi Susanna bt. Yorgi nâm Nasrâniyye muvâcehesinde ikrâr ve takrîr-i kelâm edip bundan akdem müvekkile-i mezbûre zevce olup lâkin beynimizde hüsn-i zindegâne olmamağla mehr-i müeccelinden ve nafaka-i iddet-i ma‘lûmesinden geçip ve meûnet-i süknâsı kendi üzerine ve benim firâşımdan hâsıl ve müvekkile-i mezbûreden mütevellid sagīr oğullarım Kostantin ve Anaştaşı dahi kendi malından infâk ve iksâ etmek üzere benim ile muhâla‘a-i sahîha-i şer‘iyye ile muhâla‘a olup ben dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve iskāt edip yedine hüccet-i şer‘iyye dahi vermiş idim. Ancak zevciyet beynimizde kāime iken kendi emriyle bi-şar[ti]’r-rücû‘ masârıf-ı lâzımesine ba‘zı ma‘lûmü’l-mikdâr akçe harc u sarf eyledim deyü müvekkile-i mezbûreden da‘vâya tasaddî eylediğimde beynimizde ba‘de’l-münâza‘a da‘vâ-i mezkûremden tavassut-ı muslihîn ile müvekkile-i mezbûre ile altı guruş üzerine akd-i musâlaha eylediğimde ol dahi sulh-ı mezbûru ba‘de’l-kabûl bedel-i sulh olan meblağ-ı mezbûru tamâmen ba‘de’l-ahz ve’l-kabz husûs-ı mezbûra ve târîh-i kitâba gelinceye değin beynimizde cereyân eden ahz u i‘tâ ve mu‘âmelât-ı şettâya müte‘allıka [âmme-i] da‘vâdan müvekkile-i mezbûrenin zimmetini ibrâ ve iskāt eyledim. Ba‘de’l-yevm husûs-ı mezbûra ve gayra müte‘allıka benden bi’l-asâle ve bi’l-vekâle da‘vâ zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 20 min-Rebî‘ülâhir sene 1116. Şuhûdü’l-hâl: Mehmed Efendi kâtib, Ömer Efendi kâtib, Attâr Mahmud b. Ali, Çizmeci Çavuşzâde Mehmed Çelebi, Mehmed Çelebi halîfe, el-Hâc Yusuf b. Osman, Mustafa Efendi, Veliyüddin Efendi el-kādı, Mehmed Emin Efendi el-kādı, Osman Efendi el-kâtib, Yani v. Kosta, Miskci Terzi Asvador, Terzi Sakaoğlu Nikola v. Yani.