Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 334 Hüküm no: 307 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide Hatun’un Dergâh-ı Ali Yeniçerilerinin 21. Bölük Neferatı Vakfı’ndan borç alması Havâss-ı aliyye-i refî‘a kazâsına tâbi‘ Povlince nâm karye sâkinelerinden olup zâtı ma‘rifet-i şer‘iyye ile ârifân İbrahim Çelebi b. Ali ve el-Hâc Mustafa b. Yusuf nâm kimesneler ta‘rîfleriyle mu‘arrefe olan Hamide bt. Ahmed nâm hatun mahmiye-i İstanbul’da meclis-i şer‘de dergâh-ı âlî yeniçerilerinin yirmi birinci bölüğe mahsûs oda neferâtına mevkūfe nukūdun bi’l-fi‘il mütevellîsi olan işbu bâ‘isü’l-vesîka el-Hâc İsmail b. Mehmed nâm kimesne mahzarında ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Bostan ve bir tarafdan ba‘zan Hüseyin nâm kimesne ve ba‘zan Kavlak Mustafa ve Osman nâm kimesneler mülkleri ve bir tarafdan tarîk-i hâs ve bir tarafdan tarîk-i âm ile mahdûd hâriciye ve dâhiliyede fevkānî ve tahtânî büyût-ı adîdeyi müştemil çiftlik ta‘bîr olunur mülk menzilimi bi-tarîkı’l-istiğlâl mütevellî-i merkūm el-Hâc İsmail’e yüz seksen yedi guruşa bey‘ ve mahâllinde teslîm ol dahi ber-vech-i muharrer mâl-ı vakf-ı mezbûr ile iştirâ ve kabûl ve tesellüm eyleyip semen-i mezbûr yüz seksen yedi guruşa mütevellî-i merkūm yedinden ahz u kabz eylediğimden sonra mütevellî-i merkūm menzil-i mahdûd-ı mezkûru gıbbe’t-tahliyeti’ş-şer‘iyye ve’t-takâbüzü’l-mer‘î târîh-i kitâbdan bir sene tamâmına değin yirmi yedi guruşa bana icâr ve mahâllinde teslîm ben dahi ber-vech-i muharrer isticâr ve kabûl ve tesellüm eyledim dedikde gıbbe’t-tasdîki’ş-şer‘î mezbûre Hamide Hatun meclis-i şer‘de İbrahim Çelebi b. Ali nâm kimesne mahzarında ikrâr ve takrîr-i kelâm edip mebî‘-i mezbûr hakīkatde rehin ve meblağ-ı deyn olmağın eğer müddet-i madrûbe tamâmında mütevellî-i mezbûra deyn-i mezkûru edâ ile menzil-i mezbûru fekk-i rehin etmez isem menzil-i mahdûd-ı mezkûru sûk-ı sultânîde ba‘de’l-müzâyede ve inkıtâ‘ı’r-rağbe semen-i misliyle âhara bey‘ ve kabz-ı semene ve semeninden deyn-i mezkûru mütevellî-i merkūma edâya ve fazla kalırsa bana îsâle ve husûs-ı mezbûr mütevakkıf olduğu umûrun küllîsine küllemâ azeltüke fe ente vekîlî mefhûmu üzere azl ü in‘izâlden masûne vekâlet-i devriye ile tarafımdan mezbûr İbrahim Çelebi’yi vekîl ve nâib-i menâb nasb u ta‘yîn eyledim dedikde, ol dahi vekâlet-i mezbûreyi kabûl ve merâsimini edâya ta‘ahhüd etmeğin, mâ-vaka‘a bi’t-taleb ketb olundu. Fî 21 min-şehri Rebî‘ülâhir sene 1116. Şuhûdü’l-hâl: el-Hâc Mahmud b. Mehmed, el-Hâc Mustafa b. Yusuf, İbrahim Çelebi b. Ali, Veliyüddin Efendi, Mehmed Çelebi b. Mehmed, Receb Çelebi b. Mehmed, el-Hâc Yusuf b. Osman.