Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 335 Hüküm no: 308 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Dimo’nun vefat eden Harsomo’nun mirascılarına olan borcunu ödemesi Havâss-ı aliyye kazâsı muzâfâtından Avas karyesinde sâkin Yani v. Dimo nâm zimmî mahmiye-i İstanbul’da meclis-i şer‘-i hatîrde karye-i mezbûre ahâlîsinden iken bundan akdem hâlik olan Harsomola v. Kalot nâm zimmînin verâseti zevce-i metrûkesi Bozo bt. Andon nâm Nasrâniyye ile sulbiye sagīre kızı Ağni’ye münhasıra olduğu şer‘an zâhir oldukdan sonra sagīre-i mezbûre Ağni’nin tesv[iye]-i umûruna kıbel-i şer‘den mansûbe vasîsi olan vâlidesi işbu râfi‘ü’s-sifr mezbûre Bozo Nasrâniye muvâcehesinde ikrâr ve takrîr-i kelâm edip sagīre-i mezbûre Ağni’ye zimmetinde üç yüz guruş deynim olup meblağ-ı mezbûru sagīre-i mezbûreye hâlâ edâya iktidârım olmamağla zikr olunan Avas karyesinde vâki‘ bir tarafdan Yazmend Yani menzili ve bir tarafdan Aleksandri <> tarlası ve iki tarafdan tarîk-i âm ile mahdûd fevkānî üç bâb ve tahtânî bir bâb oda ve bir ahır ve bir su kuyusu ve bir mikdâr bahçeyi müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr Nasrâniyeye üç yüz guruşa bey‘ ve temlîk, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz guruşu sagīre-i mezbûreye zimmetimde deynim olan meblağ-ı mezbûr üç yüz guruşa takās, ol dahi mukāssa ve kabûl eylediğinden sonra menzil-i mezbûrda benim kat‘â alâka ve medhalim kalmadı, mezbûre Bozo’nun mülk-i müşterâsıdır keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: el-Hâc Mehmed Efendi kâtib, Ömer Efendi kâtib, Mustafa Efendi kâtib, Emin Mehmed Efendi kâtib, el-Hâc Yusuf b. Osman, Aleksander v. Yani, Kostantin v. Yani, Kosti v. Aleksandri, Manol v. Yani, Yanako v. Yorgi, Yani v. Todori.