Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 335 Hüküm no: 309 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin tımar bedelini tahsil etmesi Mahmiye-i İstanbul’da Bakkālzâde mahâllesi sâkinlerinden olup vilâyet-i Rumeli’nde Siroz kazâsına tâbi‘ Kasrı nâm tımâra berat-ı âlîşân ile mutasarrıf olan Mehmed Çelebi b. Şaban nâm kimesne mahmiye-i mezbûrede meclis-i şer‘de işbu bâ‘isü’l-vesîka Mustafa Çelebi b. Abdullah nâm kimesne mahzarında ikrâr ve takrîr-i kelâm edip bin yüz on dört ve bin yüz on beş senelerinde tımâr-ı mezbûru zabt ve vâki‘ olan mahsûl-i şer‘îsini ahz u kabza tarafımdan mezbûr Mustafa Çelebi’yi tevkîl ol dahi ba‘de’l-kabûl mezbûr Mustafa Çelebi zikr olunan senelerde tımâr-ı mezbûru zabt ve dört yüz guruş mahsûlâtını ahz u kabz etmekle meblağ-ı mezbûr dört yüz guruşu mezbûr Mustafa Çelebi bana def‘ ü teslîm ben dahi yedinden ahz u kabz edip husûs-ı mezbûra müte‘allıka da‘vâdan her birimiz âharın zimmetini ibrâ ve iskāt eyledik [79a] dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi ve’l-ışrîn min-şehri Rebî‘ülâhir sene 1116. Şuhûdü’l-hâl: Veliyüddin Efendi el-kādı, Ahmed Efendi kâtib, Sadeddin Çelebi b. Mehmed, Ahmed Çelebi b. Ali, el-Hâc Yusuf b. Osman, İbrahim Çelebi b. Satılmış, Mehmed eş-şehîr Küçük İmam, Ömer Efendi [b.] Muslı, Abdurrahman Efendi [b.] Ömer, Ahmed Efendi b. Ömer, Süleyman Beşe.