Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 336 Hüküm no: 310 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Hüseyin’in Mehmed Çelebi’de kirpas bedelinden olan alacağının tahsili Medîne-i Gelibolu’ya tâbi‘ Kilidü’l-bahr kal‘ası ahâlîsinden el-Hâc Hasan b. Hüseyin nâm kimesne tarafından husûs-ı âti’l-beyana vekîl-i müsecceli olan Hasan Çelebi b. Ahmed nâm kimesne mahmiye-i İstanbul’da meclis-i şer‘de Mehmed Çelebi b. İbrahim nâm kimesne mahzarında bi’l-vekâle üzerine da‘vâ ve takrîr-i kelâm edip müvekkil-i mezbûrun merkūm Mehmed Çelebi zimmetinde işbu yedimde olan memhûr temessük nâtık olduğu [üzere] yedinden iştirâ ve kabz eylediği adedi beynlerinde ma‘lûm kirpas ta‘bîr olunur yelken bezi bahasından beş yüz seksen guruş hakkı olup meblağ-ı mezbûru bir def‘a otuz beş buçuk guruşunu ve bir def‘a on iki guruş ki cem‘an kırk yedi buçuk guruşunu ahz ve istîfâ edip bâkī beş yüz otuz iki buçuk guruş hakkı kalmağla hâlâ meblağ-ı bâkī-i mezbûru merkūm Mehmed Çelebi’den bi’l-vekâle taleb ederim, suâl olunup alıverilmesi matlûbumdur dedikde gıbbe’s-suâl mezbûr Mehmed Çelebi cevâbında fi’l-vâki‘ müvekkil-i mezbûr el-Hâc Hasan yedinden iştirâ ve kabz eylediği adedi beynlerinde ma‘lûm kirpas ta‘bîr olunur yelken bezi bahasından kabzını i‘tirâf eylediği meblağ-ı mezbûrdan bâkī zimmetinde beş yüz otuz iki buçuk guruş deyni olduğunu bi-tav‘ihî ikrâr u i‘tirâf <> etmeğin mûcebince meblağ-ı bâkī-i mezbûr beş yüz otuz iki buçuk guruşu vekîl-i mezbûra teslîm etmek üzere merkūm Mehmed Çelebi’ye tenbîh birle mâ-vaka‘a bi’t-taleb ketb olundu. Fî 21 min-Rebî‘ülâhir sene 1116. Şuhûdü’l-hâl: Hüseyin Efendi el-kâtib, İsmail Efendi kâtib, Veliyüddin Efendi kâtib, Mehmed Efendi kâtib.