Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 338 Hüküm no: 312 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çavuş’un Evranos b. İlyas’dan almış olduğu çiftliği iade etmesi Dergâh-ı âlî yeniçerilerinin seksen dördüncü cemâ‘atine mahsûs odada kul çavuşlarından Abdullah Çavuş b. İbrahim nâm kimesne mahmiye-i İstanbul’da meclis-i şer‘de vilâyet-i Rumeli’nde Vardar Yenicesi nevâhîsinden Kırcaova nâhiyesine tâbi‘ Köstelib? nâm karye ahâlîsinden işbu bâ‘isü’l-kitâb Evranos b. İlyas nâm kimesne mahzarında ikrâr ve takrîr-i kelâm edip mezbûr Evranos bundan akdem yedinde mülkü olup karye-i mezbûrede vâki‘ hudûdu beynimizde ma‘lûm çiftlik ta‘bîr olunur mülk menzili ile içinde mevcûd âlât-ı zirâ‘at ve hırâset cemî‘ tevâbi‘iyle bi-safkatin vâhidetin altmış beş guruşa bey‘ ve teslîm ben dahi yedinden ahz u kabz etmişdim, lâkin bu âna değin semeni olan meblağ-ı mezbûr altmış beş guruşu merkūm Evrenos’a edâ ve teslîm edemeyip [79b] zimmetinde kalmağın hâlâ rızâmız ile bey‘-i mezbûru fesh ü ikāle edip menzil-i mezbûru ve âlât ve zirâ‘at ve hırâsetini mahâllinde ahz u kabz ve zabt ve tasarrufa merkūm Evrenos’u taslît eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Veli Efendi kâtib, Mehmed Efendi kâtib, Molla Mehmed b. Hüseyin, el-Hâc Yusuf b. ( ) Hüseyin b. Hasan, Hasan b. Hüseyin, Hüseyin b. Mustafa, Zeynel b. Zeynel.