Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 338 Hüküm no: 313 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un eşi Hızır Efendi’den muhalaa usulüyle boşanması Mahmiye-i İstanbul’da Dudulatif mahâllesinde sâkine Hadîce bt. Abdülhay nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân es-Seyyid b. Ali ve Mehmed b. Ahmed nâm kimesneler şehâdetleriyle sâbit olan Abdurrahman Efendi [b.] Taceddin nâm kimesne mahmiye-i mezbûrede meclis-i şer‘de Anadolu kuzâtından işbu râfi‘ü’l-kitâb Seyyid Hızır Efendi b. Şerîf Ahmed mahzarında bi’l-vekâle ikrâr ve takrîr-i kelâm edip müvekkilem mezbûre Hadîce merkūm Seyyid Hızır Efendi’nin zevcesi olup lâkin beynlerinde hüsn-i zindegâneleri olmamağla zimmetinde mütekarrir ve ma‘kūdün-aleyh olan altı bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere zevci mezbûr ile muhâla‘a olduğunda ol dahi hul‘-ı mezbûru ba‘de’l-kabûl hukūk-ı zevciyete müte‘allıka cemî‘ da‘vâdan her biri âharın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Rebî‘ülâhir sene 1116. Şuhûdü’l-hâl: Abdullah Çelebi b. Ali, Hüseyin Efendi el-kādı, İsmail Efendi kâtib, Ömer Efendi kâtib, Emin Mehmed Efendi kâtib, el-Hâc Yusuf b. ( ).