Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 339 Hüküm no: 314 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Dizo’nun vaktiyle yakılan Kerbiniş kasabasına döndüğünde başkasının eline geçen bağlarının teslimi Vilâyet-i Rumeli’nde İnebahtı sancağında Kerbiniş kasabası sükkânından bâ‘isü’s-sifr Dimo v. Dizo nâm zimmî mahmiye-i İstanbul’da meclis-i şer‘-i hatîrde yine kasaba-i mezbûreden Yorgi v. Dimo nâm zimmî muvâcehesinde üzerine da‘vâ ve takrîr-i kelâm edip bundan akdem istîlâ esnâsında kasaba-i mezbûreyi haydûd eşkıyâsı ihrâk bi’n-nâr ve nehb ü gārât eylediklerinde benimle kasaba-i mezbûre re‘âyâlarından elli üç nefer firâr edip İnebahtı Kal‘ası’nda bir müddet sâkin ve ba‘de’s-sulh yine vatan-ı aslîmiz olan kasaba-i mezbûreye geldiğimizde hâlimize merhamet olunup taraf-ı Devlet-i aliyye’den istimâleten mutasarrıf olduğumuz emlâk ve arazilerimizin kemâ-fi’l-evvel zabt etmek üzere yedimize emr-i âlî ihsân ve ale’l-esâmi mümzâ ve mahtûm sûret-i defter verilmiş iken hâlâ mülküm olup kasaba-i mezbûre civârında Apilya nâm mevzi‘de vâki‘ etrâf-ı erba‘ası Pilni ve manastır, Yoni ve Koti nâm zimmîler bağları ve dere ile mahdûd ve üç buçuk dönüm bağımı ve iki kıt‘a ma‘lûmü’l-hudûd harâb bağ yerlerimi mezbûr Yorgi bi-gayrı hakkın zabt eder, suâl olunsun dedikde, min-külli’l-vücûh takrîr-i meşrûhunu nâtık ve târîh-i kitâb-ı şehrînin ikinci günü târîhiyle müverrah ve tuğrâ-yı garrâ ile mu‘anven bir kıt‘a emr-i âlî ve mümzâ ve mahtûm sûret-i defter ibrâz etmekle gıbbe’s-suâl mezbûr Yorgi cevâbında fi’l-hakīka hâl min-külli’l-vücûh müdde‘î-i mezbûrun takrîr-i meşrûhu üzere olup ve zikr olunan bağlar kable’l-istîlâ müdde‘î-i mezbûrun mülkü olduğunu ikrâr u i‘tirâf etmeğin ber-mûceb-i emr-i âlî mârrü’l-beyan bağlardan kasr-ı yed ve mahâllerinde müdde‘î-i mezbûr Dimo’ya teslîm etmek üzere mesfûr Yorgi’ye tenbîh olunup mâ-vaka‘a bi’t-taleb ketb olundu. Fî 23 min-Rebî‘ülâhir sene 1116. Şuhûdü’l-hâl: Mehmed Efendi b. Ahmed, Ömer Efendi b. Ali, el-Hâc Abdurrahman el-mübâşir, Ahmed Beşe b. Abdullah, Yani v. Yoni, Polo v. Niko, Yani v. Siro, İvano v. Dimitri.