Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 339 Hüküm no: 315 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimo’nun ev, bağ ve dut ağaçlarını eşi Lalo’ya satması Vilâyet-i Rumeli’nde Dimetoka kazâsı nevâhîsinden Sahrâ nâhiyesine tâbi‘ Ortaköy nâm karyeden Yorgi v. Dimo v. Kosta nâm zimmî mahmiye-i İstanbul’da meclis-i şer‘de zevcesi bâ‘isetü’l-vesîka Lalo bt. Anderya nâm Nasrâniye tarafından husûs-ı âti’l-beyanı tasdîka vekîl olduğu Niko v. Yani ve Orsisto v. Kosta nâm zimmîler şehâdetleriyle sâbit olan Yani v. Margari nâm zimmî muvâcehesinde ikrâr ve takrîr-i kelâm edip bey‘-i âtî sudûruna değin yedimde mülk ve hakkım olup karye-i mezbûrede vâki‘ bir tarafdan Moriko nâm zimmî menzili ve bir tarafdan Martin nâm zimmî menzili ve üç tarafdan tarîk-i âm ile mahdûd bir bâb oda ve sundurmayı müştemil mülk menzilimi ve menzil-i mezbûr içinde mevcûd dört fıçı ve üç bakraç ve iki tencere ve üç sahan ve üç minder ve dört kebemi ve yine karye-i mezbûre sınırında vâki‘ beyne’l-ahâlî ve’l-cîrân ma‘lûmü’l-hudûd kürûm ve eşcârı mülk olup tahmînen dört dönüm bağımı ve yine karye-i mezbûre sınırında dere içinde olan mülk iki dut ağacımı [80a] tarafeynden îcâb ve kabûlü hâvî bey‘-i kat‘î ile bi-safkatin vâhidetin zevcem müvekkile-i mezbûre Lalo’ya yetmiş guruşa bey‘ ve temlîk, ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı [mezbûr] yetmiş guruş mutâlebesinden zevcem müvekkile-i mezbûre Lalo’nun zimmetini ibrâ-i âm ile ibrâ ve iskāt eyledim. Ba‘de’l-yevm menzil-i mahdûd-ı mezbûrda ve zikr olunan eşyâda ve bağ ve dut ağaçlarında benim alâka ve medhalim kalmayıp zevcem mezbûre Lalo’nun mülk-i müşterâsı ve hakk-ı sırfı olmağla her birini mahâllinde ahz u kabz ve zabt ve tasarrufa müvekkile-i mezbûreyi taslît eyledim, her birini keyfe mâ teşâ ve tahtâr mutasarrıfe olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 23 min-Rebî‘ülâhir sene 1116 Şuhûdü’l-hâl: Arabzâde Mehmed Ağa, Gedik Ali Beşe, Hacızâde Abdülbaki, Berber Mehmed b. ( ), el-Hâc Yusuf b. Osman.