Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 340 Hüküm no: 316 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın vefat eden Kartallı Ahmed Ağa’dan almış olduğu hanı varislerine iade etmesi (bey’ bi’l-vefâ) Mahmiye-i İstanbul’da Mustafa Bey mahâllesinde sâkin Mustafa Ağa b. Abdülhafız nâm kimesne mahmiye-i mezbûrede meclis-i şer‘-i hatîrde Kartallı demekle şehîr bundan akdem vefât edip verâseti zevceteyn-i metrûketeyn Hadîce bt. Osman ve Fâtıma bt. Abdullah’a ve kebîr oğlu Mustafa Ağa’ya ve sagīr oğlu Ali’ye ve sagīre kızı Ümmügülsüm’e münhasıra olan Ahmed Ağa b. Hüseyin’in veresesinden sulbî-i kebîr oğlu ve sagīrân-ı mezbûrân Ali ve Ümmügülsüm’ün tesviye-i emrlerine vasiyy-i muhtârı olan işbu bâ‘isü’l-kitâb mezbûr Mustafa Ağa mahzarında ikrâr ve takrîr-i kelâm edip müteveffâ-yı mezbûr Kartallı Ahmed Ağa hayâtında Üsküdar’da Atpazarı? kurbünde vâki‘ iki tarafdan Abdurrahman Çelebi menzili ve bir tarafdan âhar han ve bir tarafdan tarîk-i âm ile mahdûd fevkānî ve tahtânî on iki bâb oda ve altında ahır ve sokak tarafında yedi kasab ve yedi berber [dü]kkânını müştemil Kartallı Ahmed Ağa Hanı demekle ma‘rûf hanını cümle tevâbi‘ ve levâhıkı ile bana altı yüz guruşa bey‘ ve teslîm ben dahi iştirâ ve tesellüm edip semeni olan meblağ-ı mezbûr altı yüz guruşu mezbûr Kartallı Ahmed Ağa’ya def‘ ü teslîm, ol dahi ahz u kabz edip zikr olunan han <> mülk-i müşterâm oldukdan sonra zikr olunan hîn-i bey‘den bir sene tamâmına değin semeni olan meblağ-ı mezbûr altı yüz guruşu mezbûr Ahmed Ağa bir sene tamâmına değin bana def‘ ü teslîm ederse han-ı mezbûr yine kendüye red edip teslîm etmek üzere ta‘ahhüd eylediğimden sonra mezbûr Ahmed Ağa han-ı mezbûr için kendüye medfû‘um olan meblağ-ı mezbûr altı yüz guruşun beş yüz guruşunu hayâtında bana teslîm ben dahi ahz u kabz edip bâkī kalan yüz guruş ile han-ı mezbûrun bir senelik ücreti olan altmış guruş ki cem‘an yüz altmış guruşu bana kable’l-edâ vefât etmekle han-ı mezbûru ben rızâm ile veresesine teslîmden imtinâ‘ edip beynimizde nizâ‘-ı küllî vâkı‘a olmağla el-hâletü hâzihi mezbûr Mustafa Ağa meblağ-ı bâkī-i mezbûr yüz guruş, bir senelik ücreti olan altmış guruş ki cem‘an yüz altmış guruşu müteveffâ-yı mezbûrun veresesi tarafından asâleten ve vesâyeten bana teslîm ben dahi ahz u kabz eylediğimden sonra bu vech üzere meblağ-ı mezbûr altı yüz guruş ve bir senelik han icâresi olan altmış guruş ki altı yüz altmış guruşun beş yüz guruşunu müteveffâ-yı mezbûrun hayâtında kendüden ahz u kabz edip ve yüz altmış guruşunu dahi oğlu mezbûr Mustafa Ağa’dan ahz u istifâ eylediğimden sonra bi’t-terâzî bey‘-i mezbûru fesh ve ikāle edip hâne-i mezkûru müteveffâ-yı mezbûrun veresesine def‘ ü teslîm, onlar dahi ahz u kabz eylediler ba‘de’l-yevm han-ı mezkûrda alâka ve medhalim kalmayıp bu vech üzere müteveffâ-yı mezbûrun veresesinin mülkleri olmuşdur dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Musa Efendi, Mustafa Ağa, Hasan ağa, Ali Ağa, Mustafa Çelebi, el-Hâc Yusuf.