Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 342 Hüküm no: 318 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Ahmed’in eşi Mustafa ile muhalaa usulüyle boşanması Mahmiye-i İstanbul’da Sultân Mehmed Han Câmi‘-i şerîfi kurbünde Mecdî Efendi odalarında sâkine Hanife bt. Ahmed nâm hatun zâtı ba‘de’t-ta‘rîf-i şer‘î mahmiye-i mezbûrede meclis-i şer‘de zevc-i muhâlı‘ı işbu râfi‘ü’l-vesîka Mustafa b. Abdullah nâm kimesne mahzarında ikrâr ve takrîr-i kelâm edip zevcim mezbûr Mustafa ile beynimizde hüsn-i mu‘âşeretimiz olmamağla hul‘a tâlibe olduğum ecilden zimmetinde mütekarrir ve ma‘kūdün-aleyh olan bin iki yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile muhâla‘a edip ol dahi minvâl-i muharrer üzere hul‘-ı mezbûru ba‘de’l-kabûl hukūk-ı zevciyete ve târîh-i kitâba gelince beynimizde cereyân [eden] ahz u i‘tâ ve mu‘âmelât-ı şettâya müte‘allıka âmme-i da‘vâ ve mutâlebâtdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Ömer Efendi el-kâtib, Emin Mehmed Efendi el-kâtib, Veliyüddin Efendi el-kādı, el-Hâc Yusuf b. Osman.