Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 343 Hüküm no: 320 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un vefat eden mûrisi Mustafa Çelebi’nin terekesini vasisi Ömer Efendi’den teslim alması Mahmiye-i İstanbul’da Mimarsinan mahâllesinde vâki‘ bakkāl <> zâde Mehmed Efendi odalarında sâkin iken târîh-i kitâbdan iki sene mukaddem vefât eden Mustafa Çelebi b. Hasan b. Durak’ın min-ciheti zevi’l-erhâm hasran vârisi olan mahrûse-i Mısır’da Darb Hacamaz? mahâllesinde sâkine Âişe bt. İsmail Efendi b. Hasan nâm hatun tarafından husûs-ı âti’l-beyana vekâlet iddi‘â eden zevci Mehmed Ağa b. Yusuf nâm kimesne mahmiye-i mezbûrede meclis-i şer‘-i hatîrde müteveffâ-yı mezbûrun vasiyy-i muhtârı olmağla terekesine bi’l-vesâye vâzı‘ü’l-yed olan işbu bâ‘isü’l-kitâb Ömer Efendi b. el-Hâc Muslı mahzarında üzerine da‘vâ ve takrîr-i kelâm edip müvekkilem mezbûre Âişe Hatun ammisi müteveffâ-yı mezbûrun terekesinden kendüye isâbet ve intikāl eden hisse-i ırsiyesini vasî Ömer Efendi’den taleb ve da‘vâ ve ahz u kabza ve sulh [ve] ibrâya ve kendüye îsâle ve bunların mütevakkıf olduğu umûrun küllîsine tarafından beni vekîl etmekle ben dahi ba‘de-kabûli’l-vekâle müteveffâ-yı mezbûrun terekesinden bi’l-irsi’ş-şer‘î müvekkilem mezbûre Âişe Hatun’a isâbet eden hisse-i ırsiyesini hâlâ vasiyy-i mezbûr Ömer Efendi’den taleb eylediğimde teslîmden imtinâ‘ eder, suâl olunup bana teslîme tenbîh olunması matlûbumdur dedikde, gıbbe’s-suâl vasiyy-i mezbûr Ömer Efendi cevâbında müvekkile-i mezbûre Âişe Hatun müteveffâ-yı mezbûr Mustafa Çelebi’nin min-ciheti zevi’l-erhâm hasran vârisi olduğunu ve terekesinden ba‘de-ihrâci’l-masârıf ber-mûceb-i defter-i kassâm on bin sekiz yüz on beş akçe kabzını ikrâr lâkin müdde‘î-i mezbûrun minvâl-i muharrer üzere vekâletini inkâr edicek müdde‘î-i mezbûrdan müdde‘âsını mübeyyin beyyine taleb olundukda udûl-i ricâl-i Müslimînden mahrûse-i mezbûre ahâlîsinden olup mahmiye-i mezbûrede müsâfiren sâkin Osman Beşe b. Mehmed el-Hâc Mustafa b. Ramazan nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ müvekkile-i mezbûre Âişe Hatun ammisi müteveffâ-yı mezbûr Mustafa Çelebi’nin terekesinden bi’l-irsi’ş-şer‘î kendüye isâbet ve intikāl eden hisse-i şer‘iyyesini vasiyy-i mezbûr Ömer Efendi’den taleb ve da‘vâ ve ahz u kabza ve sulh [ve] ibrâya ve kendüye îsâle ve bunların mütevakkıf olduğu umûrun küllîsine tarafından işbu müdde‘î Mehmed Ağa’yı bizim huzûrumuzda vekîl nasb u ta‘yîn edip ol dahi vekâlet-i mezbûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde, gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûrun vekâletine vasiyy-i mezbûr Ömer Efendi’nin ber-mûceb-i defter-i kassâm kabzını mu‘terif olduğu meblağ-ı mezbûr on bin sekiz yüz on beş akçeyi teslîme ba‘de’l-hükm vekîl-i mezbûr Mehmed Ağa [81a] meclis-i şer‘de merkūm Ömer Efendi mahzarında i‘âde-i kelâm edip ânifen teslîmine hükm-i şer‘î lâhık olan on bin sekiz yüz on beş akçeyi vasiyy-i mezbûr Ömer Efendi yedinden tamâmen ahz u kabz edip tereke-i müteveffâ-yı mezbûrdan mezbûr Ömer Efendi zimmetinde bir akçe ve bir habbe hakkım bâkī kalmayıp husûs-ı mezbûra müte‘allıka âmme-i da‘vâdan mezbûr Ömer Efendi’nin zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Abdülhalik Efendi b. Abdurrahman el-imâm, Mehmed Efendi b. Hüseyin, Kavukçu Mehmed Çelebi b. Mehmed, Süleyman Ağa b. Ali Ağa, Mehmed Çelebi b. Şaban, el-Hâc Yusuf b. Abdullah, Ahmed Çelebi b. Mehmed.