Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 344 Hüküm no: 321 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un eşi Mustafa Efendi’den hakim kararı ile boşanması Medîne-i Üsküdar mahâllâtından Kepçe mahâllesi sâkinelerinden olup zâtı Mehmed Çelebi b. Ahmed ve Ali b. Murad nâm kimesneler ta‘rîfleriyle mu‘arrefe olan Âişe bt. Abdullah nâm hatun mahmiye-i İstanbul’da meclis-i şer‘de zevci işbu bâ‘isü’l-vesîka Mustafa Efendi b. Esad nâm kimesne mahzarında üzerine da‘vâ ve takrîr-i kelâm edip zevcim mezbûr Mustafa Efendi târîh-i kitâbdan üç ay mukaddem beni tatlîk edip hattâ üç ay mukaddem zevce[m] Âişe’yi tatlîk etmiş idim deyü şuhûd mahzarında ikrâr dahi etmiş iken benimle yine ezvâc mu‘âmelesi murâd eder, suâl olunup men‘ ü def‘ olunması murâdımdır dedikde gıbbe’s-suâl ve akībe’l-inkâr müdde‘iye-i mezbûreden müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Lütfü Paşa mahâllesi sâkinlerinden Mehmed Efendi b. Ali ve Öksüzce mahâllesi ahâlîsinden İbrahim Çelebi b. Ahmed nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ mezbûr Mustafa Efendi bizim huzûrumuzda müdde‘iye-i mezbûre Âişe’yi târîh-i kitâbdan üç ay mukaddem tatlîk etmiş idim deyü ikrâr ve bizi işhâd etdi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Hüseyin Çavuş mübâşir, Ahmed b. Ali, Veli Çelebi b. Ahmed, Receb Beşe b. Ali, el-Hâc Yusuf b. Osman.