Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 344 Hüküm no: 322 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb Ağa’nın Rusçuk kadısı Mustafa Efendi aleyhindeki alacak davasında anlaşma sağlanması Sâbıkā Ruscuk kādısı cizyedârı olup mahmiye-i İstanbul’da Yedikule’de müsâfiren sâkin Receb Ağa b. Şaban nâm kimesne mahmiye-i mezbûrede meclis-i şer‘-i hatîrde sâbıkā Ruscuk kādısı olan Mustafa Efendi b. Yusuf tarafından husûs-ı âti’l-beyanı tasdîka vekîli olan el-Hâc Mustafa b. Salih nâm kimesne mahzarında ikrâr ve takrîr-i kelâm edip bin yüz on dört senesinde müvekkil-i mûmâ-ileyh Mustafa Efendi kazâ-i mezbûra kādı olduğu hâlde cizye mürâselesi harcı nâmıyla bi-gayrı hakkın yüz altmış guruşumu ahz u kabz etmekle meblağ-ı mezbûru bundan akdem mûmâ-ileyh Mustafa Efendi’den taleb ve da‘vâ eylediğimde nizâ‘-ı küllî vukū‘undan sonra el-hâletü hâzihi da‘vâ-i mezkûremden mûmâ-ileyh Mustafa benimle an-inkâr yüz guruş üzerine akd-i musâlaha eyledikde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûr yüz guruşu müvekkil-i mûmâ-ileyh Mustafa Efendi’den tamâmen ahz u kabz edip mâ‘adâsına müte‘allıka da‘vâdan mûmâ-ileyh Mustafa Efendi’nin zimmetini ibrâ-i âm ile ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-şehri Rebî‘i’l-âhir sene 1116. Şuhûdü’l-hâl: Eş-Şeyh Ahmed Efendi, Veli Ağa el-mübâşir, Mehmed Efendi b. Ali, Feyzullah Efendi el-kādı, Ahmed Çelebi hüddâm, el-Hâc Yusuf b. ( ).