Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 345 Hüküm no: 323 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Mehmed ve Piri b. Mustafa’nın Samako kazasındaki tarla hisselerini Ahmed Efendi’ye satmaları Mahmiye-i İstanbul’da Sofular mahâllesinde sâkin Yusuf b. Mehmed ve Odabaşı Çarşısı kurbünde sâkin Pîrî b. Mustafa nâm kimesne[ler] mahmiye-i mezbûrede meclis-i şer‘-i hatîrde işbu râfi‘ü’l-vesîka Ahmed Efendi b. Halil nâm kimesne mahzarında her biri ikrâr ve takrîr-i kelâm edip vilâyet-i Anadolu’da Samako kazâsına tâbi‘ Mesned nâm karyede vâki‘ lede’l-ahâlî ve’l-cîrân ma‘lûmü’l-hudûd Şirâzî tarlası demekle ma‘rûf bir kıt‘a tarlada olan tahmînen on keyl tohum isti‘âb eder hissemizi üzerinde mağrûs eşcâr-ı müsmire ve gayr-ı müsmiresi ile bâ-ma‘rifet-i sâhib-i arz ve ferâğ-ı kat‘î-i mu‘teber ile beş buçuk guruş bedel mukābelesinde mezbûr Ahmed Efendi’ye ferâğ ve tefvîz ve mahâllinde zabt u tasarrufa tarafımızdan taslît edip ol dahi tefevvüz ve kabûl eylediğinden bedel-i merkūm beş buçuk guruşu mezbûr Ahmed Efendi yedinden tamâmen ahz u kabz ve beynimizde bi-kadri’l-hısas iktisâm eyledik ba‘de’l-yevm zikr olunan tarlada olan hisse-i mezkûrelerimiz mezbûr Ahmed Efendi’nin dâhil-i havza-i tasarrufu olup bizim kat‘â alâkamız kalmadı dediklerinde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, Mustafa Efendi b. Halil, Abdülbaki Efendi b. Ahmed Efendi, Mustafa b. Ebubekir, İbrahim b. Rasul, Mehmed Efendi el-kādı, el-Hâc Yusuf b. Osman.