Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 350 Hüküm no: 331 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçları menkul terekesinden fazla olarak vefat eden Murtaza Ağa’nın emlakının satılması Sâbıkā Sekbânbaşı olup düyûnu terekesinden ezyed olduğu hâlde bundan akdem vefât eden Murtaza Ağa b. Haşim b. Ahmed’in metrûkâtını ahz u kabz ve düyûnunu edâya kıbel-i şer‘den mansûb vasîsi olan Ahmed Ağa b. Ali nâm kimesne mahmiye-i İstanbul’da meclis-i şer‘-i hatîrde mahmiye-i mezbûrede Uzunçarşı kurbünde sâkin işbu bâ‘isü’l-vesîka Mehmed Ağa b. el-Hâc Hüseyin Ağa tarafından husûs-ı âti’l-beyana vekîl olduğu Mehmed Efendi b. el-Hâc İbrahim ve Osman Efendi b. Abdülfettah nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan diğer Ahmed Ağa b. Mehmed nâm kimesne mahzarında bi’l-vesâye ikrâr ve takrîr-i kelâm edip müteveffâ-yı mezbûrun düyûn-ı kesîresi olup menkūlât terekesi vefâ etmeyip akārâtının dahi bey‘i lâzım gelmekle bi’l-izni’ş-şer‘î müteveffâ-yı mezbûrun emlâkından olup Diyarbekir kazâsında Havass-ı hümâyûn karyelerinden Şark-ı Amid’de Arslanoğlu nâm karyede vâki‘ lede’l-ahâlî ve’l-cîrân ma‘lûmü’l-hudûd yirmi aded damı müştemil çiftlik ta‘bîr olunur menzili cemî‘ tevâbi‘ ve levâhıkı ile ve içinde mevcûd on beş re’s karasığır öküzü ve beş re’s karasığır ineği ve dört re’s karasığır tosunu ve elli beş keyl mezrû‘ hınta ve yirmi beş keyl mezrû‘ şa‘îr ve bir buçuk keyl mezrû‘ nohudu mecma‘-ı nâs olan mahâllerde dört aydan mütecâviz nidâ ve müzâyede etdirilip rağabât-ı nâs bi’l-külliye münkatı‘a oldukdan sonra çiftlik-i mezkûr müştemilâtı ve içinde mevcûd zikr olunan hayvânât ve hubûbât üç yüz elli guruşda müvekkil-i mezbûr Mehmed Ağa üzerinde karâr edip ziyâde ile tâlib-i âhar dahi zuhûr etmeyip ve meblağ-ı mezbûr üç yüz elli guruş çiftlik-i mezbûrun el-an semen-i misli olduğu zeyl-i kitâbda mektûbü’l-esâmi Müslimîn ihbârlarıyla müte‘ayyin olmağla çiftlik-i mezbûru cemî‘ tevâbi‘ ve levâhıkı ile ve içinde mevcûd hayvânâtı ve mezrû‘âtı ile meblağ-ı mezbûr üç yüz elli guruşa müvekkil-i mezbûr Mehmed Ağa’ya bi’l-vesâye bey‘ ü temlîk ve mahâllinde zabt ü tasarrufa taslît edip ol dahi ber-vech-i muharrer iştirâ ve temellük ve kabûl eyledikden sonra semen-i mezbûr üç yüz elli guruşu müvekkil-i merkūm tamâmen bana def‘ ü teslîm edip ben dahi yedinden ahz u kabz eyledim. Ba‘de’l-yevm çiftlik-i mezbûr müvekil-i mezbûrun mülk-i müşterâsıdır, mahâllinde keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti Cumâdelûlâ li-sene sitte aşere ve mi’e ve elf. Şuhûdü’l-hâl: el-Hâc Hüseyin Ağa Dervişzâde?, Mehmed Emin Çelebi b. Ahmed, Bayram Çelebi b. ( ), İbrahim Çelebi b. Abdullah, Abdülvahhab Ağa b. Hacı Hüseyin, el-Hâc Hüseyin b. Hızır, İsmail Ağa Solakzâde, Seyyid Hüseyin Çelebi b. ( ).