Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 351 Hüküm no: 332 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hanım’ın menzil ve müştemilatını Hatice Hatun’a satması Hilâl-i sutûrda mastûr olan husûsun mahâllinde ketb ü tahrîri iltimâs olunmağın cânib-i şer‘-i âlîden irsâl olunan Mevlânâ Mustafa Efendi b. Mehmed Efendi İstanbul’da Altıpoğaça mahâllesi sâkinlerinden fahrü’l-ümerâ es-Seyyid Ali Bey b. el-merhûm es-Seyyid Mustafa Paşa’nın menziline varıp zeyl-i vesîkada mektûbü’l-esâmi olan Müslimîn huzûrlarında akd-i meclis-i şer‘-i mübîn eyledikde yine mahmiye-i mezbûrede Çerâğī Hamza mahâllesinde sâkine fahrü’l-muhadderât zübdetü’l-muvakkarât Fâtıma Hanım bt. el-merhûm Abdullah Efendi tarafından husûs-ı âti’l-beyana vekîl olduğu zât-ı müşârün-ileyhâyı ma‘rifet-i şer‘iyye ile ârifân olan es-Seyyid Ahmed Efendi b. es-Seyyid Mehmed Bey b. Abdullah nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan müvekkile-i mûmâ-ileyhânın zevci umdetü’l-müderrisîni’l-kirâm Ahmed Efendi b. Mehmed meclis-i ma‘kūd-ı mezbûrda fahrü’l-muhadderât işbu râfi‘atü’l-kitâb Şerîfe Hadîce nâm hanım bt. el-merhûm Mustafa Paşa mahzarında bi’l-vekâle ikrâr ve takrîr-i kelâm edip müvekkilem mûmâ-ileyhânın yedinde mülk ve hakkı olup mârrü’z-zikr Çerâğī Hamza mahâllesinde vâki‘ bir tarafdan Abdüllatif Ağa veresesi ve bir tarafdan Hatîb Mustafa Efendi ve bir tarafdan ba‘zan Emine Hatun ve ba‘zan Âişe Hatun mülkleri ve bir tarafdan tarîk-i âm ile mahdûd ve mümtâz hâriciyesinde fevkānî üç bâb oda ve bir sagīr kahve odası ve bir sofa ve bir kenîf ve bir mikdâr havluyu ve dâhiliyesinde fevkānî iki bâb oda ve dört sofa ve bir kenîf ve tahtânî iki bâb oda ve iki sofa ve bir matbâh ve bir kenîf ve bir hamam ve bir câmekân odası ve bi’r-i mâ ve havluyu müştemil menzili mûmâ-ileyhâ Şerîfe Hadîce Hanım’a tarafeynden îcâb ve kabûlü hâvî şurût-ı müfsideden [ârî] bey‘-i bâtt-ı sahîh-i şer‘î ile bin yüz guruşa bey‘ ve teslîm ve temlîk, ol dahi ber-vech-i muharrer iştirâ ve kabûl ve tesellüm ve temellük eylediğinden sonra semeni olan meblağ-ı mezbûru mûmâ-ileyhâ mezbûre yedinden tamâmen ahz u kabz eyledim ba‘de’l-yevm menzil-i mahdûd-ı mezkûr mûmâ-ileyhâ-yı mezbûrenin [83a] mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’l-mu‘teber husûs-ı mezbûru mevlânâ-yı mezbûr mahâllinde ketb ü tahrîr ve ba‘dehû ma‘an ba‘s olunan Mehmed Çelebi b. Abdullah ve Ahmed b. Mehmed ile meclis-i şer‘e gelip alâ-vukū‘ıhî inhâ ve takrîr etmeğin mâ-vak‘a bi’t-taleb ketb olundu. Fi’l-yevmi’s-sâlis min-Cumâdelûlâ li-sene sitte aşere ve mi’e ve elf. Şuhûdü’l-hâl: Fahrü’l-ümerâ es-Seyyid Ali Bey b. es-Seyyid Mustafa Paşa, Fahrü’l-akrân Mehmed Ağa b. Ali, Sinan Efendi b. Ali, Ahmed Efendi b. el-Hâc Üveys, el-Hâc Mehmed b. Mustafa, Hasan b. Abdullah, Ahmed b. Abdullah.