Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 352 Hüküm no: 333 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un kızı Rahime’nin boşandığı eşinden olan ve yanında bulunan Rukıye için nafaka tahsisi Mahmiye-i İstanbul’da Emirbuhâri mahâllesinde sâkine işbu râfi‘atü’l-vesîka Fâtıma bt. el-Hâc Ahmed nâm hatun mahmiye-i mezbûrede meclis-i şer‘-i hatîrde takrîr-i kelâm ve ta‘bîr ani’l-merâm edip işbu hâzır bi’l-meclis Mehmed b. ( ) nâm kimesnenin firâşından hâsıla ve zevce-i mutallakası sadriye kızım Rahime’den mütevellide ve bi-hakkı’l-hıdâne hâlâ hacr ve terbiyemde olan Rukıye nâm sagīrenin nafaka ve kisve ve sâir levâzım-ı zarûriyesi için babası mezbûr Mehmed üzerine kıbel-i şer‘den kadr-ı ma‘rûf nafaka farz ve takdîr olunmak murâdımdır dedikde, hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi sagīre-i mezbûrenin nafaka ve kisve-baha ve sâir levâzım-ı zarûriyesi için târîh-i kitâbdan külle yevmin bi’t-terâzî on beşer sağ akçe nafaka farz ve takdîr edip meblağ-ı mefrûz-ı mezkûru nafaka ve kisve ve sâir havâyic-i zarûriyesine harc u sarfa ve vakt-i zarûretde istidâne ve lede’z-zafer babası mezbûr Mehmed üzerine rücû‘a mezbûre Fâtıma’ya kıbel-i şer‘den izin verilmeğin mâ-vaka‘a bi’t-taleb ketb olundu. Fi’l-yevmi’r-râbi min-Cumâdelûlâ li-sene sitte aşere ve mi’e ve elf. Şuhûdü’l-hâl: Hüseyin Efendi kâtib, Mehmed Efendi kâtib, İsmail Efendi kâtib, el-Hâc Yusuf kâtib, Yusuf Çelebi b. Abdullah,