Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 353 Hüküm no: 335 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un Mustafa Efendi’yi vekil tayin etmesi Husûs-ı âti’l-beyanın mahâllinde tahrîri için bi’l-iltimâs savb-ı şer‘den irsâl olunan mevlânâ Ali Efendi b. Ahmed Efendi mahmiye-i İstanbul’da Çerâğī Hamza mahâllesinde vâki‘ Abdüssamedzâde Mehmed Efendi’nin menziline varıp zeyl-i vesîkada muharrerü’l-esâmi Müslimîn huzûrunda akd-i meclis-i şer‘-i kavîm ettikde Şeyhülislâm merhûm Debbâğzâde Mehmed Efendi’nin halîle-i metrûkesi olup zâtı ma‘rifet-i şer‘iyye ile ârifân Hüseyin Efendi b. Abdüsselam ve Mehmed Efendi b. Yusuf Efendi ta‘rîfleriyle mu‘arrefe olan umdetü’l-muhadderât Safiye Hatun bt. el-merhûm İzzetî eş-Şeyh Mehmed Efendi b. Lütfullah Efendi meclis-i ma‘kūd-ı mezkûrda işbu bâ‘isü’l-kitâb fahrü’l-müderrisîni’l-kirâm Mustafa Efendi b. Ahmed Efendi mahzarında ikrâr ve takrîr-i kelâm edip bundan akdem mahâlle-i mezbûrede vâki‘ ma‘lûmü’l-hudûd mülk menzilim bi-emrillâhi te‘âlâ bi’l-külliye muhterik olup müceddeden binâya muhtâc olmağla Ayasofya-i kebîr Evkāfı’ndan mahmiye-i mezbûrede Du‘â Meydanı demekle ma‘rûf mahâlde vâki‘ izn-i mütevellî vakf-ı mezbûr ve icâreteyn-i ma‘hûdeyn ile tasarrufumda olan ma‘lûmü’l-hudûd üç bâb yağlıkçı dükkânlarım ile yine vakf-ı mezbûrdan Ayazmakapısı hâricinde vâki‘ ma‘lûmü’l-hudûd bir bâb keresteci dükkânımı izn-i mütevellî ve bedel-i misli ile âhara ferâğ ve bedelini kabza ve bedel-i merkūmu muhterik olan menzilimin binâsına harc u sarfa işbu müşârün-ileyh Mustafa Efendiyi <> tarafımdan vekîl ve nâib-i menâb [nasb] edip ol dahi vekâlet-i merkūmeyi kabûl ve merâsimini edâya ta‘ahhüd eylediğini mevlânâ-yı mezbûr mahâllinde tahrîr ba‘dehû ma‘an ba‘s olunan Osman b. İsmail ve Ahmed b. Abdullah ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Cemâziyelûlâ li-sene sitte aşere ve mi’e ve elf. Şuhûdü’l-hâl: Umdetü’l-müderrisîn Mustafa Efendi b. Mehmed, el-Hâc Mehmed Yağlıkçı, İslâm Beşe b. Bayram, Mehmed Efendi b. İbrahim, Hüseyin Beşe b. Osman, Musa b. Abdullah, Mehmed Çelebi b. Mehmed, İbrahim Çelebi b. Abdülbaki sah.