Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 354 Hüküm no: 336 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Palaş’ın kardeşi Laskari’den menzil bedelinden olan alacağını tahsil etmesi Husûs-ı âti’l-beyanın mahâllinde istimâ‘ı ve ketb ü tahrîri için savb-ı şer‘îden mezûnen irsâl olunan Mevlânâ Hüseyin Efendi b. Himmet mahmiye-i İstanbul’da Yenikapı hâricinde Gül Câmi‘i mahâllesi mütemekkinlerinden iken bundan akdem hâlik olan Palaş v. Manol nâm zimmînin ile’l-helâk sâkin olduğu menziline varup zeyl-i kitâbda muharrerü’l-esâmi olan Müslimîn huzûrunda akd-i meclis-i şer‘-i mübîn eyledikde hâlik-i mezbûrun verâseti zevce-i metrûkesi Maryora bt. Nikola nâm Nasrâniyeye ve sulbî kebîr oğulları Aleksandri ve Manol ve Laskari ve Yanaki ve Kostantin ve Şirban nâm zimmîlere ve sulbiye kebîre kızı Elena nâm Nasrâniyeye münhasıra ve tashîh-i meseleleri yüz dört sehmden i‘tibâr olunup sihâm-ı mezbûre on üç sehmi zevcesi mezbûre Maryora’ya ve on dörder sehmi dahi oğulları mezbûrûn Aleksandri ve Manol ve Laskari ve Yanaki ve Kostantin ve Şirba’dan her birine ve yedi sehmi dahi kızı mezbûre Elena’ya isâbet ve intikāl eylediği şer‘an zâhir oldukdan sonra mahmiye-i mezbûrede Fenerkapısı kurbünde sâkin olup hâlik-i mezbûrun oğlu mezbûr Yanaki tarafından ber-vech-i âtî iddi‘â-yı vekâlet eden Zafiri v. Yamandi nâm zimmî meclis-i ma‘kūd-ı mezbûrda müvekkil-i mezbûrun li-ebeveyn karındaşı işbu bâ‘isü’s-sifr mezbûr Laskari muvâcehesinde üzerine da‘vâ ve takrîr-i kelâm edip mezbûr Yanaki bundan akdem diyâr-ı Eflak’a gider oldukda babası hâlik-i mezbûrdan kendi ile sâir veresesine isâbet ve intikāl edip işbu bir tarafdan Kazzâz Mehmed Çelebi mülkleri ve bir tarafdan Kürkçü Yorgaki ile kızı Kokona mülkleri ve bir tarafdan tarîk-i âm ve bir tarafdan sâhil-i bahr ile mahdûd ve tarîk-i âm tarafında üç bâb fevkāni oda ve bir tahta-pûş ve altında bir oda ve bir matbâh ve bir kilâr ve bir kenîf ve deryâ tarafında dahi iki bâb oda ve bir kenîf ve mahzeni müştemil menzilden tashîh-i mezbûr üzere sihâm-ı mezbûreden kendüye isâbet eden on dört sehim hissesini semen-i misli olan iki yüz elli guruşa âhara bey‘ ve semenini kabz edip semeninden vâlidesi mezbûre Maryora’ya deyni olan üç yüz guruşdan yüz guruşu ve karındaşı işbu hâzır bi’l-meclis mezbûr Manol’a dahi yedinde olan hüccet-i şer‘iyye nâtık olduğu üzere emriyle malından bi-tarîkı’s-sulh Ali Çelebi b. Ebubekir nâm kimesneye edâ eylediği on bin sağ akçe ve sâir beynlerinde ma‘lûm deyn-i şer‘îden dahi sekiz bin akçe ki be-hesâb-ı guruş yüz elli guruş olmak üzere cem‘an iki yüz elli guruşu edâ ve teslîm etmek üzere tarafından beni vekîl ben dahi ba‘de’l-kabûl müvekkil-i mezbûr Yanaki’nin menzil-i mezbûrda olan on dört sehim hissesini vekâlet-i mahkiyem hasebiyle karındaşı mezbûr Laskari’ye iki yüz elli guruşa cümle tevâbi‘i ile bey‘ ve teslîm ol dahi iştirâ ve tesellüm ve kabûl eylediğinden sonra semen-i mezbûr iki yüz elli guruşu mezbûr Laskari’den taleb eylediğimde bana edâdan imtinâ‘ eder. suâl olunsun dedikde gıbbe’s-suâl mezbûr Laskari cevâbında müdde‘î-i mezbûr vech-i muharrer üzere vekâletini isbât eylesin deyip vekâletini inkâr edicek müdde‘î-i mezbûrdan vech-i meşrûh üzere vekâletine beyyine taleb olundukda mahmiye-i mezbûrede Sultânhamamı kurbünde sâkin Mayok v. Dador ve Kefeli mahâllesinde sâkin Bedros Minas nâm zimmîler li-ecli’ş-şehâde meclis-i ma‘kūd-ı mezbûra hâzırân olun istişhâd olunduklarında fi’l-vâki‘ mezbûr Laskari’nin li-ebeveyn karındaşı mezbûr Yanaki bundan akdem diyâr-ı Eflak’a gider oldukda menzil-i mahdûd-ı mezbûrda olan on dört sehim hisse-i ırsiyesini semen-i misli olan iki yüz elli guruşa âhara bey‘ ve semenini kabz edip semeninden vâlidesi mezbûre Maryora’ya deyni olan üç yüz guruşdan yüz guruşu ve karındaşı işbu hâzır bi’l-meclis mezbûr Manol’a dahi yedinde olan hüccet-i şer‘iyye nâtık olduğu üzere emriyle malından bi-tarîkı’s-sulh mezbûr Ali Çelebi’ye verdiği on bin akçe ve sâir beynlerinde ma‘lûm deyn-i şer‘îden sekiz bin akçe ki be-hesâb-ı guruş iki yüz elli guruş deynini edâ ve teslîm etmek üzere tarafeynden işbu müdde‘î-i mezbûr Zafiri’yi bizim huzûrumuzda vekîl ve nâib-i menâb nasb u ta‘yîn edip ol dahi kabûl eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de-ri‘âyet-i şerâiti’l-kabûl şehâdetleri makbûle olmağın mûcebince müdde‘î-i mezbûrun vekâletine ba‘de’l-hükm semen-i menzil-i mezbûr iki yüz elli guruşu müdde‘î-i mezbûra edâ ve teslîme mezbûr Laskari’ye tenbîh olundukdan sonra müdde‘î-i mezbûr Zafiri meclis-i ma‘kūd-ı mezbûrda yine mezbûr Laskari muvâcehesinde i‘âde-i kelâm edip ânifen edâsına tenbîh olan semen-i menzil-i mezbûr iki yüz elli guruşu mezbûr Laskari tamâmen bana edâ ve teslîm ben dahi vekâletim hasebiyle ahz u kabz, meblağ-ı mezbûrdan müvekkil-i mezbûrun vâlidesi mezbûre Maryora’ya deyni olan üç yüz guruşdan yüz guruşu ve mezbûr Manol’a dahi yüz elli guruş ki cem‘an iki yüz elli guruşu her birine edâ ve teslîm eyledim dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an ba‘s olunan Çukadâr el-Hâc Ali ve Osman Çelebi b. Mehmed ile meclis-i şer‘e gelüp alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Cumâdelûlâ li-sene sitte aşere ve mi’e ve elf. Şuhûdü’l-hâl: Mehmed Çelebi b. Abdürrezzak, Mehmed Çelebi b Hayreddin, İvaz Beşe b. Abdullah, Hüseyin Çelebi b. Mustafa, Abdullah Çelebi b. Satılmış.