Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 355 Hüküm no: 337 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzon Gümrüğü Eminleri Feyzullah Ağa ile Ali Ağa’nın Hüseyin Efendi’ye borçları olduğunu ikrar etmeleri Ber-vech-i iştirâk te’bîden malikâne Trabzon Gümrüğü emînleri olan Feyzullah Ağa b. Osman [b.] Mehmed ve Ali Ağa b. Ahmed b. Hüseyin mahmiye-i İstanbul’da meclis-i şer‘de hâlâ Ter[s]âne emîni olan umdetü’l-emâcid ve’l-e‘âlî bâ‘isü hâze’l-kitâb Hüseyin Efendi b. Ramazan Ağa tarafından husûs-ı âti’l-beyana vekîl olduğu İsmail Efendi b. Mustafa ve el-Hâc Mustafa b. Murad şehâdetleri ile şer‘an sâbit olan Fazlullah Efendi b. Receb mahzarında her biri ikrâr-ı tam ve takrîr-i kelâm edip hâlâ uhdemizde olan gümrük-i mezbûrun mu‘accelesi ve berat harcı ve sâir masârıf-ı ma‘lûmesi için yedinden istikrâz ve kabz ve istihlâk etmekle müvekkil-i müşârün-ileyh Hüseyin Efendi’ye ber-vech-i iştirâk zimmetimizde yedi bin yüz sekiz guruş deynimiz olup lâkin meblağ-ı mezbûru icâleten edâya iktidârımız olmayıp ber-vech-i âtî tecîle tâlib olduğumuzda ol dahi meblağ-ı merkūmu târîh-i kitâb gününden altı ay tamâmına değin bize tecîl etdikde biz dahi kabûl ve meblağ-ı merkūm yedi bin yüz sekiz guruşu ecel-i mezbûr hulûlüne değin edâ edemez isek mukāta‘a-i merkūmeyi rızâ ve ihtiyârımız ile müvekkil-i müşârün-ileyhe kasr-ı yed etmek üzere ta‘ahhüd eyledik. Hâlâ meblağ-ı merkūm yedi bin yüz sekiz guruş müvekkil-i müşârün-ileyh Hüseyin Efendi’ye ber-vech-i iştirâk deynimizdir dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti Cumâdelûla sene 1116. Şuhûdü’l-hâl: Keresteci el-Hâc İbrahim b. Mehmed, Abdurrahim Çelebi b. el-Hâc Abdullah, Mehmed Efendi b. Salih, İbrahim Çelebi b. Hüseyin, Ali Efendi b. Ahmed Efendi, el-Hâc Yusuf b. ( ).