Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 356 Hüküm no: 338 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Döngeleçoğlu Ali’nin eski Rusçuk kadısı Ahmed Efendi ile kethüdası Bayram aleyhindeki alacak davasının reddedilmesi Vilâyet-i Rumeli’nde Ruscuk ahâlîsinden Döngeleçoğlu demekle ma‘rûf Ali b. ( ) nâm kimesne mahmiye-i İstanbul’da meclis-i şer‘-i hatîrde sâbıkā Ruscuk kādısı olan işbu râfi‘ü’l-kitâb Ahmed Efendi b. ( ) mahzarında üzerine da‘vâ ve takrîr-i kelâm edip mezbûr Ahmed Efendi bundan akdem Ruscuk kādısı olduğu hâlde bi-gayrı hakkın benim yüz esedî guruşumu ahz u kabz etmekle bundan akdem meblağ-ı mezbûrun kırk guruşunu yedinden ahz u kabz edip bâkī altmış guruş hakkım zimmetinde kalmış idi, hâlâ suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl, mezbûr Ahmed Efendi cevâbında müdde‘î-i mezbûr Ali târîh-i kitâbdan otuz iki ay mukaddem mahrûse-i Edirne’de Rumeli kādıaskeri olan Dede Mehmed Efendi huzûrunda benim ile işbu hâzır bi’l-meclis kethüdâm Bayram’dan meblağ-ı mezbûr yüz guruşu taleb ve da‘vâ eyledikde biz dahi husûs-ı mezbûru inkâr edip ol dahi isbâtdan âciz oldukdan sonra tavassut-ı müslihîn ile an-inkâr da‘vâ-i mezkûresinden benden kabzını mu‘terif olduğu meblağ-ı mezbûr kırk guruş üzerine sulh etdiklerinde müdde‘î-i mezbûr dahi sulh-ı mezbûru kabûl ve bedel-i sulh olan meblağ-ı mezbûr kırk esedî guruşu tamâmen ahz u kabz edip bâkī altmış guruşa müte‘allıka da‘vâdan benim ile mezbûr Bayram’ın zimmetini ibrâ ve iskāt etmişidi deyü def‘le mukābele edicek, gıbbe’l-istintâk ve’l-inkâr mezbûr Ahmed Efendi’den def‘-i mezbûruna beyyine taleb olundukda Anadolu kuzâtından olup mahmiye-i mezbûrede Sultân mahâllesinde sâkin Numan Efendi b. Abdurrahman ve Nişâncı mahâllesinde sâkin el-Hâc Mustafa b. Mehmed nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ târîh-i kitâbdan otuz iki ay mukaddem işbu müdde‘î-i mezbûr Ali mahrûse-i mezbûrede Rumeli kādıaskeri olan Dede Mehmed Efendi huzûrunda mezbûr Ahmed Efendi ile kethüdâsı hâzır bi’l-meclis Bayram’dan meblağ-ı mezbûr yüz guruşu taleb ve da‘vâ edip onlar dahi inkâr etmeleri ile ikāmet-i beyyineden izhâr-ı acz eyledikden sonra da‘vâ-i mezkûresinden bizim huzûrumuzda kırk esedî guruş üzerine mezbûr Ahmed Efendi ile sulh eylediklerinde müdde‘î-i merkūm Ali dahi kabûl ve bedel-i sulh olan meblağ-ı mezbûr kırk esedî guruşu mezbûr Ahmed Efendi yedinden tamâmen ahz u kabz edip meblağ-ı bâkī-i mezbûr altmış guruşa müte‘allıka da‘vâdan mezbûrân Ahmed Efendi ile kethüdâsı Bayram’ın zimmetlerini ibrâ ve iskāt eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Ali meblağ-ı bâkī-i mezbûr altmış guruş talebiyle ber-vech-i muharrer mu‘âraza’dan men‘ olunup mâ-vaka‘a bi’t-taleb ketb olundu. Fî-gurreti Cumâdelûlâ sene 1116 Şuhûdü’l-hâl: Reis Veli Efendi, Kâtib Ahmed Çelebi, İslâm Çelebi, Sâ‘atçi Hüseyin Çelebi, Mehmed Çelebi b. Abdullah.