Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 361 Hüküm no: 345 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un eşi Hüseyin Çavuş’tan muhalaa yoluyla boşanması Mahmiye-i İstanbul’da Alipaşa mahâllesi sâkinelerinden olup zâtını ma‘rifet-i şer‘iyye ile ârifân Ahmed Çelebi b. Mustafa ve Hasan Beşe b. İbrahim nâm kimesneler ta‘rîfleriyle mu‘arrefe olan Safiye bt. Abdullah nâm hatun mahmiye-i mezbûrede meclis-i şer‘-i hatîrde zevc-i muhâlı‘ı işbu râfi‘ü’l-vesîka Hüseyin Çavuş b. Hasan nâm kimesne mahzarında bi-tav‘ihâ ikrâr ve takrîr-i kelâm edip mezbûr Hüseyin Çavuş zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan üç bin akçe mehr-i müeccelimden bin iki yüz akçesini bana def‘ ü teslîm ben dahi yedinden ahz u kabz etdiğimden sonra bâkī bin sekiz yüz akçe mehr-i müeccelimden ve nafaka-i iddet-i ma‘lûmemden fâriğā olmak üzere ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete ve gayra müte‘allıka âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min-Cumâdelûlâ li-sene sitte aşere ve mi’e ve elf. Şuhûdü’l-hâl: Mehmed Efendi kâtib, Mustafa Efendi kādı, Mehmed Emin Efendi el-kādı, Ömer Efendi kâtib, el-Hâc Yusuf b. Osman.