Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 367 Hüküm no: 354 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mehmed’in menzil hissesini kızı Ayşe’ye satması Mahmiye-i İstanbul’da Alipaşa-i atik mahâllesi sâkinelerinden olup zâtı Mustafa Efendi b. Abdülaziz ve Mehmed b. Ramazan nâm kimesneler ta‘rîfleriyle mu‘arrefe olan Fâtıma bt. Mehmed nâm hatun mahmiye-i mezbûrede meclis-i şer‘de sulbiye-i kebîre râfi‘atü’l-vesîka Âişe bt. Ömer Efendi nâm hatun tarafından husûs-ı âti’l-beyanı tasdîka vekîl-i şer‘îsi olan Yorganî Yusuf Çelebi b. el-Hâc Murad nâm kimesne mahzarında ikrâr ve takrîr-i kelâm edip kızım müvekkil-i mezbûrenin babası olup benim zevcim iken bundan akdem fevt olan Ömer Efendi’nin terekesinden olup mahâlle-i mezbûrede vâki‘ ma‘lûmü’l-hudûd mülk menzilin sekiz sehmde bir sehm-i şâyi‘i benim ve yedi sehmi kızım müvekkile-i mezbûrenin mülk-i mevrûsu olmağla ber-vech-i muharrer menzil-i mezkûrda olan bir sehim hisse-i şâyi‘amı bundan akdem kızım müvekkile-i mezbûre Âişe’ye tarafeynden îcâb ve kabûlü hâvî bey‘-i kat‘î ile elli guruşa bey‘ ve teslîm, ol dahi iştirâ ve tesellüm ve kabûl eyledikden sonra semen olan meblağ-ı mezbûru tamâmen yedinden ba‘de’l-ahz ve’l-kabz menzil-i mezkûrun yedi sehmi kızım müvekkile-i mezbûrenin mülk-i mevrûsu ve bir sehmi dahi mülk-i müşterâsı oldukdan sonra menzil-i mezkûrun içinde mevcûd iki minder ve bir döşek ve iki yorgan ve beş aded yasdık ve iki tencere ve beş aded sahan ve üzerimde lâbise olduğum köhne libâsımdan mâ‘adâ kat‘â bir şeyde alâka ve medhalim olmayıp bi’l-cümle kızım müvekkile-i mezbûre Âişe Hatun’un mülk ve hakkıdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min-Cumâdelûlâ li-sene sitte aşere ve mi’e ba‘de’l-elf. Şuhûdü’l-hâl: Mehmed Efendi el-imâm, Ahmed Çelebi el-müezzin, Hoca Molla Halil b. ( ), Mehmed Çavuş sipâhiyân, Mustafa b. Şaban, Mehmed Beşe b. Ramazan, Mustafa Hoca b. Abdülaziz.