Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 368 Hüküm no: 356 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Mehmed’in, oğlunun mirasından dolayı Ali Bey b. Abdullah’da olan alacağını tahsil etmesi Vilâyet-i Rumeli’nde Kırkkilise kasabasında Câmi‘-i cedîd mahâllesinde sâkin olup mahmiye-i İstanbul’da sâbıkā Silistre kādısı olan Geliboluvî Mehmed Efendi hânesinde müsâfiren sâkin iken bundan akdem vefât eden Molla Ahmed b. Ali Bey b. Mehmed’in hasran vârisi olan babası mezbûr Ali Bey mahmiye-i mezbûrede meclis-i şer‘-i hatîrde müteveffâ-yı mezbûrun vasiyy-i muhtârı olmağla terekesine vâzı‘ü’l-yed olan bâ‘isü’l-kitâb diğer Ali Bey b. Abdullah mahzarında ikrâr ve takrîr-i kelâm edip oğlum müteveffâ-yı mezbûrun hîn-i vefâtında ben yanında bulunmamağla ber-mûceb-i defter tereke-i ma‘lûmesini mezbûr diğer Ali Bey vesâyeten ahz u kabz etmekle hâlâ makbûzu olan terekeyi mezbûr diğer Ali Bey bana tamâmen def‘ ü teslîm, ben dahi verâsetim hasebiyle yedinden ahz u kabz edip husûs-ı mezbûra müte‘allıka da‘vâdan mezbûr diğer Ali Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim, fîmâ-ba‘d oğlum müteveffâ-yı mezbûrun terekesine müte‘allıka mezbûr diğer Ali Bey ile aslâ da‘vâ ve nizâ‘ım kalmadı dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdi aşer min-Cumâdelûlâ li-sene sitte aşere ve mi’e ba‘de’l-elf. Şuhûdü’l-hâl: Fahrü’l-kuzât Mehmed Efendi, Mehmed Çelebi b. İvaz, el-Hâc Mehmed Efendi el-kâtib, İsmail Efendi el-kâtib, Mehmed b. İbrahim, Veli Efendi Reis-i küttâb, Ahmed Çelebi kâtib, Ömer Efendi b. Ali, Emin Mehmed Efendi el-kādı.