Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 369 Hüküm no: 357 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah, Ömer ve Osman’ın bağ hisselerini Musa Çelebi’ye satmaları Mahmiye-i İstanbul’da Saraçhâne-i kebîr kurbünde sâkin fahrü’l-müderrisîn es-Seyyid Abdullah Efendi ve es-Seyyid Ömer Efendi ibneyi’l-müvellâ el-merhûm Hocazâde es-Seyyid Osman Efendi ile mûmâ-ileyhimânın karındaşları olup bundan akdem vefât eden es-Seyyid Mehmed Efendi’nin sulbî sagīr oğlu es-Seyyid Osman’ın büyük vâlidesi ve vasiyy-i şer‘îsi Şerîfe Emetullah Hatun tarafından husûs-ı âti’l-beyana vekîl olduğu Bayram b. Mehmed ve el-Hâc Osman b. İsmail nâm kimesneler şehâdetleriyle şer‘an sâbit olan es-Seyyid Hüseyin Efendi b. es-Seyyid İsmail mahmiye-i mezbûrede meclis-i şer‘-i hatîrde bâ‘isü’l-kitâb Musa Çelebi b. Hasan nâm kimesne muvâcehesinde bi’l-vekâle ikrâr ve takrîr-i kelâm edip akd-i âtî sudûruna değin müvekkilûn-ı mezbûrûnun babaları müteveffâ-yı müşârün-ileyhden müntakil mülkleri olup mahrûse-i Galata nevâhîsinden İstinye nâhiyesine tâbi‘ Boğazkesen kal‘ası civârında Şehidler Çayırı demekle ma‘rûf mevzi‘de vâki‘ etrâf-ı erba‘ası Mehmed ve Sıvacıoğlu diğer Mehmed ve Horoz Ali nâm kimesneler bağları ve tarîk-i âm ile mahdûd tahmînen seksen ırgadlık olup kürûm ve câ-be-câ eşcâr-ı müsmire ve gayr-ı müsmireli harâbe bağın hâsılı harcına vefâ etmemekle semen-i misli ile âhara bey‘ olunmak sagīr-i mezbûr hakkında dahi her vechile evlâ ve enfa‘ olmağın bi’l-izni’ş-şer‘î bağ-ı mezbûr sûk-ı sultânîde mecma‘-ı nâs olan mahâllerde nidâ ve müzâyede etdirilip ba‘de-inkıtâ‘i’r-rağbe elli guruşda mezbûr Musa Çelebi üzerinde karâr edip ziyâde ile tâlib-i âhar zuhûr etmeyip ve meblağ-ı merkūm hîn-i bey‘de bağ-ı mezkûrun semen-i misli idüğü sikāt ihbârıyla mütehakkık olmağın ben dahi vekâletim hasebiyle bağ-ı mezbûru semen-i misli olan meblağ-ı merkūm elli guruşa bi-cümleti’t-tevâbi‘ ve’l-levâhık mezbûr Musa Çelebi’ye tarafeynden îcâb ve kabûlü hâvî bâtten bey‘ ve temlîk, ol dahi ber-vech-i muharrer iştirâ ve temellük ve kabûl eylediğinden semen-i merkūm elli guruşu merkūm Musa Çelebi yedinden tamâmen ahz u kabz eyledim, fîmâ-ba‘d bağ-ı mahdûd-ı mezbûr merkūm Musa Çelebi’nin mülk-i müşterâsıdır, müvekkillerimin kat‘â alâkaları kalmadı, mahâllinde keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min-Cumâdelûlâ sene sitte aşere ve mi’e ve elf. Şuhûdü’l-hâl: Fahrü’l-müderrisîn Abdullah Efendi, Mehmed Efendi b. Ahmed, İsmail Efendi el-kâtib, Ömer Efendi b. İbrahim, el-Hâc Osman b. İsmail.