Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 370 Hüküm no: 358 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Mehmed Efendi’ye, Kapıcı Hasan Bey Vakfı’ndan istiğlal yoluyla aldığı borç için Osman Efendi’nin kefil olması Mahmiye-i İstanbul’da Kasab İvaz mahâllesi sükkânından İmam Mehmed Efendi b. el-Hâc Mustafa nâm kimesne mahmiye-i mezbûrede meclis-i şer‘-i hatîrde mahmiye-i mezbûrede Mesihpaşa mahâllesinde merhûm Kapıcı Hasan Bey Vakfı’nın nukūd-ı mevkūfesine bi’l-fi‘il mütevellî olan işbu râfi‘ü’l-vesîka diğer Hasan Bey b. Abdullah nâm kimesne mahzarında ikrâr ve takrîr-i kelâm edip silk-i mülkümde münselik olup mahrûse-i Galata muzâfâtından kasaba-i Beşiktaş’a tâbi‘ Arnavud nâm karyede vâki‘ bir tarafdan Osman Ağa mülkü ve bir tarafdan Milo nâm zimmî mülkü ve bir tarafdan leb-i deryâ ve bir tarafdan tarîk-i âm ile mahdûd dâhiliyesinde fevkānî bir bâb oda ve bir sofa ve tahtında bir bâb oda ve bir mahzen ve bi’r-i mâ ve bir harâbe matbâh ve bir mikdâr havlu ve hâriciyesinde fevkānî bir bâb oda ve nerdüban üzerinde bir sagīr kilâr ve tahtında bir bâb mahzen ve Salahor Osman Ağa cânibinde sokağa meftûh bir buçuk zirâ‘ kapı yerini ve yine cânib-i mezbûrda deryâya varınca bir buçuk zirâ‘ damlalığı hâvî mülk menzilimi cümle tevâbi‘ ve levâhıkı ile mütevellî-i mezbûra yüz elli guruşa bi-tarîkı’l-istiğlâl bey‘ ve teslîm ol dahi ber-vech-i muharrer mâl-ı vakf-ı mezbûr ile iştirâ ve kabûl eylediğinden sonra semen olan meblağ-ı merkūm yüz elli guruşu müteveffâ-yı mezbûr yedinden tamâmen ahz u kabz etdikden sonra mütevellî-i merkūm menzil-i mahdûd-ı mezbûru gıbbe’t-tahliyeti’ş-şer‘iyye târîh-i kitâbdan bir sene tamâmına değin on beş guruşa bana icâr ve mahâllinde teslîm, ben dahi isticâr ve kabûl eyledim dedikde gıbbe’t-tasdîki’ş-şer‘î işbu hâzır bi’l-meclis Osman Efendi b. Mustafa Efendi nâm kimesne meblağ-ı merkūm yüz elli guruş ile ücret-i mezkûra on dört guruşki cem‘an yüz altmış beş guruşa tarafeynden emr u kabûlü hâvî kefâlet-i sahîha ile kefil olmağın mâ-hüve’l-vâki‘ bi’t-taleb ketb olundu. Fî 14 min-Cumâdelûlâ sene 1116 Şuhûdü’l-hâl: Osman Efendi kâtib, el-Hâc Yusuf muhzır, Ömer Efendi kâtib, Mehmed Efendi b. Ahmed, Molla Hasan kayyûm, Molla İsmail, Yusuf Çelebi b. Abdullah, Mehmed Efendi b. Rıdvan, Mustafa Çelebi b. Hasan, Hasan Çelebi b. Ali, Mehmed Çelebi b. Süleyman.