Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 371 Hüküm no: 359 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un çocuklarının nafakası hususunda boşandığı eşi İbrahim Ağa ile anlaşması Mahmiye-i İstanbul’da Sarrâcishak mahâllesinde sâkine olup zâtı kebîr oğlu Ebubekir b. Şahin ile Mehmed Çelebi b. Ahmed nâm kimesneler ta‘rîfleriyle mu‘arrefe olan Havva bt. Mustafa nâm hatun mahmiye-i mezbûrede meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-kitâb İbrahim Ağa b. Hasan mahzarında ikrâr ve takrîr-i kelâm edip mezbûr İbrahim Ağa zevcim olup beni tatlîk etmekle mezbûrun firâşından hâsıla ve benden mütevellide âkıle ve bâliğa olup hâlâ benimle sâkin olan oğlum Ömer ve kızım Fâtıma’nın şer‘an hak ve terbiyeleri ve nafaka ve kisveleri babaları mezbûr İbrahim Ağa üzerine olup hâlâ bi’t-terâzî mezbûr İbrahim Ağa mezbûrları yedimden ahz etmeyip ben dahi mezbûrân için mezbûr İbrahim Ağa’dan bir nesne taleb etmeyip kendi malımdan infâk ve iksâ etmek üzere ta‘ahhüd ve iltizâm eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sâlis aşer min-Cumâdelûlâ li-sene sitte aşere ve mi’e ba‘de’l-elf. Şuhûdü’l-hâl: Mehmed Çavuş b. Ahmed, İsmail Efendi el-kâtib, Ömer Efendi el-kādı, Veliyüddin Efendi el-kādı, Yusuf Çelebi b. Abdullah, el-Hâc Yusuf b. Osman.