Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 371 Hüküm no: 360 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir b. Şahin’in, üvey babası İbrahim Ağa’nın zimmetini ibra etmesi Mahmiye-i İstanbul’da Sarrâcishak mahâllesinde sâkin Ebubekir b. Şahin nâm kimesne mahmiye-i mezbûrede meclis-i şer‘de mukaddemâ üvey babası olan işbu bâ‘isü’l-kitâb İbrahim Ağa b. Hasan mahzarında ikrâr ve takrîr-i kelâm edip mezbûr İbrahim Ağa mukaddemâ benim üveyi babam olup, hâlâ vâlidem Havva bt. Mustafa nâm hatunu tatlîk etmekle zevciyet beynlerinde kāime iken üveyi babam mezbûr İbrahim Ağa ile beynlerinde nice ahz [u] i‘tâ ve mu‘âmelât-ı şettâ vâki‘ olmuş idi, el-hâletü hâzihi târîh-i kitâba gelince üveyi babam mezbûr İbrahim Ağa ile beynlerinde cereyân eden ahz u i‘tâ ve mu‘âmelât-ı şettâya müte‘allıka âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik, fîmâ-ba‘d birbirimiz ile aslâ da‘vâ ve nizâ‘ımız kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min-Cemâziyelûlâ sene sitte aşere ve mi’e ve elf. Şuhûdü’l-hâl: es-Sâbıkūn.