Bab Mahkemesi 54 Numaralı Sicil (H. 1102 / M. 1691) cilt: 20, sayfa: 368 Hüküm no: 448 Orijinal metin no: [78a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Odabaşı b. Mehmed’in Mehmed Beşe’ye verdiği ödüncün geri ödenmediği iddiasının reddi Mahmiye-i İstanbul’da Ayvansaray kapısı kurbunda sâkin olup, hâlâ Dergâh-ı âlî yeniçerileri cemâ‘atinden Yirmisekizinci Ağa Bölüğü’ne mahsûs hücrede oda bekçisi olan Süleyman Odabaşı b. Mehmed nâm kimesne meclis-i şer‘-i şerîf ve mahfil-i dîn-i münîf-i ezherde, işbu sâhibü’l-kitâb Mehmed Beşe b. Mustafa mahzarında üzerine da‘vâ ve takrîr-i kelâm edip, vasîsi olduğum üvey kızım Fâtıma bt. Şaban nâm sagīrenin babasından intikāl eden nukūddan on’ı on bir hesâbı üzre vesâyetim hasebiyle mezbûr Mehmed Beşe’ye Altmış guruş def‘ u teslîm edip, ol dahi ber vech-i muharrer yedimden ahz u kabz etmişidi. Hâlâ meblağ-ı mezbûru mezbûr Mehmed Beşe’den taleb ederim suâl olunup alıverilmesi matlûbumdur dedikde, gıbbe’s-suâl mezbûr Mehmed Beşe cevâbında, fi’l-vâki‘ minvâl-i muharrer üzre meblağ-ı merkūmu vasiyy-i mezbûr yedinden ahz u kabz edip, bi’d-defa‘ât yine kendiye tamâmen def‘ ve teslîm eyledim deyu def‘le mukābele edicek, gıbbe’l-istintâk ve akībe’l-inkâr mezbûr Mehmed Beşe’den def‘-i mezbûrunu mübeyyin beyyine taleb olundukda, ityân-ı beyyineden izhâr-ı acz ile istihlâf etmeğin, müdde‘î Süleyman Odabaşı’ya meblağ-ı mezbûru bi’d-defa‘ât mezbûr Mehmed Beşe yedinden tamâmen ahz u kabz eylemediğine yemîn teklîf olundukda yemînden nükûl etmeğin, mûcebince müdde‘î-i mezbûr Süleyman Odabaşı Merkūm Mehmed Beşe’ye bî-vech mu‘ârazadan men‘ olunup, mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire sene 1102. Şuhûdü’l-hâl: Sâlih Çelebi b. Mustafa, Mustafa Çelebi ( ), İbrahim Çelebi b. Ahmed, Ali b. Bâli.