Bab Mahkemesi 54 Numaralı Sicil (H. 1102 / M. 1691) cilt: 20, sayfa: 368 Hüküm no: 449 Orijinal metin no: [78a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fodıya v. Yoğvan hür olduğundan serbest bırakılması İşbu orta boylu açık kaşlı kara gözlü hâmilü hâzihi’l-vesîka Fodıya v. Yoğvan nâm şâbb-ı emred meclis-i şer‘-i şerîf-i enverde kendiye rık olmak üzre vaz‘-ı yed eden Kester v. Atvas nâm zimmî muvâcehesinde üzerine da‘vâ ve takrîr-i kelâm edip, ben diyâr-ı Eflak’da Bükreş kasabasına tâbi‘ Bekvaç nâm karye re‘âyâsından mezkûr Yoğvan’ın firâşından hâsıl ve zevcesi Katelyo nâm nasrâniyyeden mütevellid olup bana ve ebeveynim mezkûrâna kat‘â rık târî olmayıp hürrü’l-asl iken mezbûr Kester rık olmak üzre vaz‘-ı yed eder, hâlâ suâl olunup üzerimden yed-i mubtılasının kasr ve izâle ve sebîlim tahliye olunmak matlûbumdur dedikde, gıbbe’s-suâl merkūm Kester cevâbında, ben mevsûf-ı mezbûru gāib ani’l-meclis Bernak nâm zimmî zimmetinde altmış esedî guruş hakkım olup gāib-i mezbûr meblağ-ı mezbûr mukābilesinde bana bey‘ u teslîm, ben dahi iştirâ ve teslîm edip, ol vechile mülk-i müşterâm olmağla vaz‘-ı yed ederim, müdde‘î-i mezkûrun ber vech-i meşrûh hürrü’l-asl olduğu ma‘lûmum değildir deyicek, müdde‘î-i mezbûrdan da‘vâsına mutâbık beyyine taleb olundukda, mahmiye-i İstanbul’da Eflak beyi menzilinde sâkine Rado v. Vançe ve Dimitri v. Liyo nâm zimmîler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka işbu mevsûf-ı mezbûr Fodıya diyâr-ı Eflak’da Bükreş kasabasına tâbi‘ Bekvaç nâm karye re‘âyâsından mezkûr Poğvan’ın firâşından [78b] hâsıl ve zevcesi Katelyo’dan mütevellid olup, işbu müdde‘î-i mezbûre ve ebeveyn-i mezbûrâna kat‘â rık târî olmayıp, hürrü’l-asıldır. Biz bu husûsa bu vech üzre şâhidleriz, şehâdet dahi ederiz deyu her biri edâ-yı şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın, mûcebiyle müdde‘î-i mezbûrun hürriyetine ba‘de’l-hükm, müdde‘î-i mezbûrun üzerinden mezbûr Kester’in yed-i mubtılasının kasr ve izâlesine tenbîh olunup sebîli tahliye olunmağın, mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: Ali Çavuş b. Abdullah, İbrahim Çelebi b. Ahmed, İbrahim Çelebi b. ( ), Ahmed Çelebi b. İdris, Ali b. Bâki.