Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 371 Hüküm no: 361 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Mehmed’in evini İbrahim Çelebi’ye satması Mahmiye-i İstanbul’da Akşemseddin mahâllesinde sâkine Rabia bt. Mehmed nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân İbrahim b. Ali ve Hüseyin b. Abdi nâm kimesneler şehâdetleriyle sâbite olan Rasul Efendi b. Muharrem nâm kimesne mahmiye-i mezbûrede meclis-i şer‘de işbu râfi‘ü’l-vesîka İbrahim Çelebi b. Mustafa nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkile-i mezbûrenin yedinde mülkü olup mahâlle-i mezbûrede vâki‘ bir tarafdan Âişe Hatun mülkü ve iki tarafdan tarîk-i âm ile mahdûd bir bâb fevkānî oda ve bir bâb tahtânî oda ve bir matbâh ve ahır ve bir mikdâr bahçeyi müştemil mülk menzilini tarafeynden îcâb ve kabûlü hâvî bey‘-i kat‘î ile mezbûr İbrahim Çelebi’ye yüz altmış guruşa bey‘ ü teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûru tamâmen yedinden ahz u kabz eyledi, ba‘de’l-yevm menzil-i mahdûd-ı mezbûr merkūm İbrahim Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min-Cumâdelûlâ li-sene sitte aşere ve mi’e ve elf. Şuhûdü’l-hâl: Ebubekir Efendi b. Receb, İmam Ahmed Efendi b. Ebubekir, Müezzin Mehmed Çelebi b. ( ), Mehmed Ağa b. ( ), Hacı Mustafa b. Mehmed.