Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 372 Hüküm no: 362 Orijinal metin no: [87b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin arsasını müştemilatı ile birlikte Fatıma bt. Mehmed’e satması Mahmiye-i İstanbul’da Muhtesib İskender mahâllesinde sâkin İbrahim Çelebi b. Mehmed nâm kimesne mahmiye-i mezbûrede meclis-i şer‘-i hatîrde işbu bâ‘isetü’l-kitâb Fâtıma bt. Mehmed nâm hatun tarafından husûs-ı âti’l-beyanı tasdîka vekîl-i şer‘îsi olan zevci Hasan Çelebi b. Mehmed nâm kimesne mahzarında bi-tav‘ihî ikrâr ve takrîr-i kelâm edip akd-i âti’l-beyanın sudûruna değin yedimde mülk ve hakkım olup mahâlle-i mezbûrede vâki‘ bir tarafdan Afife Hatun menzili ve bir tarafdan Hadîce Hatun mülkü ve bir tarafdan Murad Paşa Vakfı’ndan olup Ahmed Ağa tasarrufunda olan menzil ve bir tarafdan tarîk-i âm ile mahdûd mümtâz bi’r-i mâyı müştemil arsa-i hâliyemi cümle tevâbi‘ ve levâhıkı ile müvekkile-i mezbûre Fâtıma Hatun’a tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile otuz bir guruşa bey‘ ve teslîm ve temlîk, ol dahi ber-vech-i muharrer iştirâ ve tesellüm ve temellük ve kabz eylediğinden sonra semeni olan meblağ-ı mezbûru yedinden tamâmen ahz u kabz eyledim, ba‘de’l-yevm arsa-i mahdûd-ı mezkûr müvekkile-i mezbûre Fâtıma’nın mülk-i müşterâsıdır keyfe mâ yeşâ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşer min-Cumâdelûlâ li-sene sitte aşere ve mi’e ve elf. Şuhûdü’l-hâl: Mustafa b. Mehmed, İbrahim Çelebi b. Mustafa, İsmail Çelebi b. İbrahim, Abdi Ağa b. Mustafa, Mustafa Çelebi b. Ömer, Ebubekir b. Yusuf, İbrahim Ağa b. Mustafa.