Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 373 Hüküm no: 363 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kireççi taifesinden Londo’nun, Todori’de olan alacağının tahsili talebi Mahmiye-i İstanbul’da Edirnekapısı kurbünde sâkin Kireççi tâifesinden işbu râfi‘ü’s-sifr Londo v. Kiro nâm zimmî mahmiye-i mezbûrede meclis-i şer‘-i hatîrde Todori v. Nikola nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Todori zimmetinde cihet-i karz-ı şer‘îden kırk yedi bin akçe hakkım olup hâlâ meblağ-ı mezbûru mesfûr Todori’den taleb eylediğimde bana edâdan imtinâ‘ eder, suâl olunup alıverilmesi matlûbumdur dedikde, gıbbe’s-suâl mezbûr Todori cevâbında müdde‘î-i mezbûra cihet-i mezkûreden ancak otuz dört bin sekiz yüz seksen yedi akçe zimmetimde vâcibü’l-edâ deynim vardır deyü ikrâr ziyâde on iki bin yüz on üç akçesini inkâr etmekle mûcebince ikrârı mertebesi olan meblağ-ı merkūm otuz dört bin sekiz yüz seksen yedi akçeyi müdde‘î-i mezbûra edâ ve teslîme mesfûr Todori zimmîye tenbîh olunup müdde‘î-i mezbûrun ziyâde müdde‘âsı için beyyineye havâle olunmağın mâ hüve’l-vâki‘ bi’t-taleb ketb olundu. Fi’l-yevmi’r-râbi aşer min-Cumâdelûlâ li-sene sitte aşere ve mi’e ve elf. Şuhûdü’l-hâl: Kādızâde Mehmed Efendi, Mehmed Emin Efendi el-kādı, Ömer Efendi el-kādı, Mustafa Efendi el-kâtib, el-Hâc Osman tâbi‘-i hazret efendi, el-Hâc Yusuf b. Osman.