Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 373 Hüküm no: 364 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fas Hatun’un mirasçılarının menzil davasında sulh olması Mahmiye-i İstanbul’da Çukurhamam kurbünde sâkin iken bundan akdem fevt olan Fas bt. Mehmed nâm hatunun sulbiye kebîre kızı Kerime nâm hatun zâtı ba‘de’t-ta‘rîf mahmiye-i mezbûrede meclis-i şer‘de işbu râfi‘ü’l-vesîka Mehmed b. Satılmış ve Mustafa b. İbrahim nâm kimesneler mahzarlarında ikrâr ve takrîr-i kelâm edip vezîriazâm-ı sâbık Siyavuş Paşa evkāfından olup zikr olunan Çukurhamamı kurbünde vâki‘ bir tarafdan Abdi nâm kimesne menzili ve bir tarafdan Hicâzî nâm kimesne menzili ve bir tarafdan Çukurhamamı külhanı ve bir tarafdan tarîk-i âm ile mahdûd fevkānî bir bâb odayı ve altında ahırı ve bir sagīr odayı ve bir mikdâr havluyu müştemil vakıf menzil icâreteyn-i ma‘lûmeteyn ile vâlidem müteveffâ-yı mezbûrenin hayâtında taht-ı tasarrufunda olup ba‘de-vefâtihâ sulbî kebîr oğlu Ahmed’e ve bana bi-hasebi’l-âdî intikāl eyledikden sonra ben âhar yerde bulunmağla menzil-i vakf-ı mezkûru karındaşım mezbûr Ahmed mezbûrân Mehmed ve Mustafa’ya bâ-ma‘rifet-i mütevellî ferâğ ve tefvîz onlar dahi tefevvüz ve kabûl etmeleriyle karındaşım mezbûr Ahmed’in ferâğını hâvî vakf-ı mezbûr mütevellîsi yedlerine mümzâ ve mahtûm temessük dahi verdiğinden sonra hâlâ ben dahi gelip ber-vech-i muharrer menzil-i vakf-ı mezbûrda olan hissemi mezbûrândan taleb ve da‘vâya tasaddî etmiş idim. El-hâletü hâzihi mezbûrân Mehmed ve Mustafa alâ tarîkı’s-sulh bana on üç guruş def‘ ü teslîm ben dahi ba‘de’l-ahz ve’l-kabz karındaşım mezbûr Ahmed’in menzil-i vakf-ı mezkûrda mezbûrâna olan ferâğını tecvîz edip ba‘de’l-yevm menzil-i vakf-ı mezkûra müte‘allıka âmme-i da‘vâdan mezbûrân Mehmed ve Mustafa’nın zimmetlerini ibrâ ve iskāt eyledim, min-ba‘d husûs-ı mezkûra müte‘allıka mezbûrân ile aslâ da‘vâ ve nizâ‘ım yokdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 13 min-Cumâdelûlâ sene 1116 Şuhûdü’l-hâl: Mustafa b. Mehmed, Receb b. Bâli, Hasan b. Şaban, Hüseyin b. İbrahim, Hüseyin Çelebi b. Abdullah, el-Hâc Ali çukadâr, el-Hâc Yusuf b. Osman.