Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 374 Hüküm no: 365 Orijinal metin no: [88a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksandra bt. Yani’nin kızı Fotna aleyhindeki ev davasında haksız olduğu Mahmiye-i İstanbul’da Fener kapısı dâhilinde Abdi Subaşı mahâllesi sâkinelerinden Aleksandra bt. Yani nâm Nasrâniyye mahmiye-i mezbûrede meclis-i şer‘de sulbiye kebîre kızı râfi‘atü’l-vesîka Fotna bt. Dimitri nâm Nasrâniye tarafından husûs-ı âti’l-beyana vekîl olduğu nehci’ş-şer‘î üzere sâbit olan zevci Yani v. Sava nâm zimmî muvâcehesinde merkūm Karaçelebizâde Mehmed Efendi Evkāfı’nın bi’l-fi‘il mütevellîsi Osman Ağa hâzır olduğu hâlde üzerine da‘vâ ve takrîr-i kelâm edip merhûm-ı mezbûrun evkāfından olup mahâlle-i mezbûrede vâki‘ müteehhilîn odalarından ma‘lûmü’l-hudûd bir bâb tahtânî odaya icâreteyn-i ma‘lûmeteyn ile anam Yelhazon bt. Dimitri nâm Nasrâniye mutasarrıfe iken hâlike olmağla bi-hasebi’l-kānûn zikr olunan vakıf bana intikāl-i âdî ile intikāl etmiş iken kızım müvekkile-i mezbûre Fotna bi-gayrı vechin zabt ve tasarruf eder, vekîl-i mezbûra suâl olunup müvekkilesi kızım mezbûrenin kasr-ı yedine tenbîh olunmak matlûbumdur dedikde, gıbbe’s-suâl vekîl-i mezbûr cevâbında fi’l-vâki‘ zikri mürûr eden vakıf oda müdde‘iye-i mezbûrenin anası mezbûre Yelhazon’un icâreteyn-i ma‘lûmeteyn ile hayâtında taht-ı tasarrufunda iken helâkından iki sene mukaddem bin yüz on üç senesi Şevvâli’l-mükerreminin evâhirinde mahzar-ı şuhûdda müvekkile-i mezbûre Fotna’ya bâ-izn-i mütevellî ferâğ ve tefvîz, ol dahi tefevvüz ve kabûl edip hattâ târîh-i mezbûrda vakf-ı mezbûra mütevellî olan mezbûr Osman Ağa ferâğ ve kasr-ı yedini müş‘ir yedine temessük dahi vermekle bu vech üzere taht-ı tasarrufundadır deyü def‘le mukābele ve mütevellî-i mezbûrun husûs-ı mezbûru nâtık ve târîh-i mezbûr ile müverrah ve imzâ ve hatemini hâvî bir kıt‘a temessük ibrâz eylediğinde isre’n-nazar ve’l-kırâe ve gıbbe’l-istintâk ve’l-inkâr vekîl-i mezbûrdan def‘-i mezkûruna beyyine taleb olundukdan sonra udûlden ve mahâlle-i mezbûre ahâlîsinden Sakosta v. Tarandafil ve Dimitri v. İstefan ve Yorgaki v. Moso nâm zimmîler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ zikr olunan vakıf oda müdde‘iye-i mezbûrenin anası mezbûre Yelhazon bt. Dimitri’nin icâreteyn-i ma‘lûmeteyn ile hayâtında taht-ı tasarrufunda iken helâkinden iki sene mukaddem bin yüz on üç senesi Şevvali’nin evâhirinde bizim huzûrumuzda müvekkile-i mezbûre [88b] Fotna’ya bâ-izn-i mütevellî ferâğ ve tefvîz ol dahi tefevvüz ve kabûl etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 10 min-Cumâdelevvel sene 1116. Şuhûdü’l-hâl: Mehmed Çavuş b. Ali, Abdullah Çelebi [b.] Hâmi, el-Hâc Ali b. Abdullah, el-Hâc Yusuf b. Osman.