Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 375 Hüküm no: 366 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yasef ile Yaprak Menteş’in Edirneli Ali Ağa’ya olan borçlarının tecil edilmesi Tâife-i Yahûdun Sisilye Cemâ‘ati’nden olup mahmiye-i İstanbul’da Mahmudpaşa kurbünde Yeni Han’da sâkin Edirneli Yasef v. Mosi ve Küçükportakal Cemâ‘ati’nden olan Yaprak? Menteş v. Kamal nâm Yahûdîler mahmiye-i mezbûrede meclis-i şer‘-i hatîrde işbu bâ‘isü’l-kitâb Edirneli Ali Ağa yedinde olan üç kıt‘a memhûr deyn temessükümüz nâtık olduğu üzere cihet-i deyn-i şer‘îden mezbûr Ali Ağa’ya zimmetimizde dört bin dokuz yüz guruş deynimiz olmağla meblağ-ı mezbûrun iki yüz elli guruşunu hâlâ mezbûr Ali Ağa’ya edâ ve teslîm ol dahi yedimizden ahz u kabz edip ba‘de-külli’l-hesâb mezbûr Ali Ağa’ya dört bin altı yüz elli guruşu merkūm Ali Ağa’ya def‘aten edâya iktidârımız olmayıp tecîle tâlib olduğumuzda ol dahi târîh-i kitâbdan bin dokuz yüz seksen gün tamâmında kendüye ikimiz ma‘an dört yüz guruş verip ve bâkī kalan ikiyüz elli guruşu dahi müddet-i mezbûre tamâmından yüz yirmi gün tamâmına değin edâ ve teslîm etmek üzere merkūm Ali Ağa bizi tecîl ve taksît etmekle bu vech üzere mezbûr Ali Ağa’ya ber-minvâl-i muharrer târîh-i kitâbdan cem‘an iki bin yüz gün tamâmına değin edâ ve teslîm etmek üzere hâlâ zimmetimizde vâcibü’l-edâ ve lâzımü’l-kazâ dört bin altı yüz elli guruş müeccel ve mukassat deynimiz vardır dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 4 min-Rebî‘ülevvel sene 1116 Şuhûdü’l-hâl: Hacı Mehmed b. Abdullah, Osman b. Ahmed, Mehmed b. Ahmed, Mehmed Bey Bâki kulu, Ahmed b. Abdullah, Ali b. Mehmed, İbrahim Ağa [b.] Hüseyin, Küçük Ahmed, Ali Çavuş.