Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 376 Hüküm no: 367 Orijinal metin no: [88b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın kefaletten dolayı Mustafa Ağa’da olan alacağını tahsili Bosna eyâletinde Nova Kal‘ası kapudanı işbu râfi‘ü’l-vesîka İbrahim Ağa b. Ali nâm kimesne mahmiye-i İstanbul’da meclis-i şer‘de kal‘a-i mezbûrede azebân-ı sânî ağası olan Mustafa Ağa b. Ali nâm kimesne mahzarında üzerine da‘vâ ve takrîr-i kelâm edip kal‘a-i mezbûre dizdarı olup hâlâ onda sâkin Ömer Ağa b. Arslan ve azebân-ı evvel Ali Ağa b. el-Hâc Ramazan ve İshak Kethüdâ b. Abdullah ve Müstedam Ağa b. Abdülmümin ve Mehmed Ağa b. Ahmed ve diğer Mehmed Ağa b. Arslan ve Fârisân-ı sânî Ağası Hasan Ağa b. Mahmud ve Fârisân-ı sâlis Ağası İbrahim Ağa b. Süleyman ve Ahmed Ağa b. Mustafa Martolyan-ı evvel Ali Ağa b. Abdullah ve Murad Ağa b. Kurd ve Sertopî İbrahim Ağa b. Süleyman ve Rüstem Ağa b. Süleyman nâm kimesneler zimmetlerinde cihet-i karz-ı şer‘îden bin seksen altı buçuk guruş hakkım olmağla târîh-i kitâbdan on beş ay mukaddem meblağ-ı mezbûra merkūm Mustafa Ağa tarafından emr u kabûlü hâvî kefâlet-i sahîha ile kefil olmağın hâlâ meblağ-ı mezbûru merkūm Mustafa Ağa’dan kefâletine binâen taleb eylediğimde bâ[na] edâdan imtinâ‘ eder, suâl olunup meblağ-ı mezbûr bi-hükmi’l-kefâle bana edâya tenbîh olunmak matlûbumdur dedikde gıbbe’s-suâl mezbûr Mustafa Ağa cevâbında fi’l-hakīka müdde‘î-i mezbûra merkūmûnun zimmetlerinde cihet-i karzdan meblağ-ı mezbûr bin seksen altı buçuk guruş deynleri olduğunu ikrâr lâkin meblağ-ı mezbûra kendi kefil olduğunu inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden ve ahâlî-i kal‘a-i mezbûreden İbrahim Ağa b. el-Hâc Rıdvan ve Salih Ağa b. Osman nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-hakīka müdde‘î-i mezbûrun merkūmûn Ömer Ağa b. Arslan ve Ali Ağa b. el-Hâc Ramazan ve İshak Kethüda b. Abdullah ve Müstedam Ağa b. Abdülmümin ve Mehmed Ağa b. Ahmed ve diğer Mehmed Ağa b. Arslan ve Ahmed Ağa b. Mustafa ve Ali Ağa b. Abdullah ve Murad Ağa b. Kurd ve İbrahim Ağa b. Süleyman ve Rüstem Ağa b. Süleyman zimmetlerinde cihet-i karzdan hakkı olan meblağ-ı mezbûr bin seksen altı buçuk guruşa mezbûr Mustafa Ağa târîh-i kitâbdan on beş ay mukaddem bizim huzûrumuzda tarafeynden emr u kabûlü hâvî kefâlet-i sahîha-i şer‘iyye kefil olmuş idi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm meblağ-ı mezbûr bin seksen altı buçuk guruşu müdde‘î-i mezbûra edâ ve teslîme merkūm Mustafa Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sânî aşer min-Cumâdelûlâ li-sene sitte aşere ve mi’e ve elf. Şuhûdü’l-hâl: Ahmed Ağa b. Abdurrahman, Küçük Ömer b. Süleyman, İbrahim Ağa b. ( ), Salih Ağa b. ( ).