Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 377 Hüküm no: 368 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un muhalaa yoluyla boşandığı eşi Hüseyin’in zimmetini ibra etmesi Mahmiye-i İstanbul’da Hoca Hayreddin mahâllesinde vâki‘ Emir Buhârî odalarında sâkine olup zâtı Abdullah Çavuş b. Hasan ve Mustafa Beşe b. İbrahim nâm ta‘rîfleriyle mu‘arrefe olan Fâtıma bt. Ahmed nâm hatun mahmiye-i mezbûrede meclis-i şer‘-i hatîrde zevci olup vilâyet-i Rumeli’nde Kavala nâm kasabada sâkin işbu bâ‘isü’l-vesîka Hüseyin b. Mehmed nâm kimesne tarafından husûs-ı âti’l-beyana vekîl olduğu es-Seyyid Mustafa Çelebi b. es-Seyyid Mehmed ve Şaban Beşe b. Mahmud nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan Abdulvahhab Efendi b. Osman mahzarında bi-tav‘ihâ ikrâr ve takrîr-i kelâm edip müvekkil-i mezbûr Hüseyin kasaba-i mezbûrede sâkin olup benimle mu‘âmele-i zevciyet mümkün olmamağla zimmetinde mütekarrir ve ma‘kūdün-aleyh olan dört bin akçe mehr-i müeccelim üzerine ve nafaka-i iddet-i mu‘ayyenem ve meûnet-i süknâm dahi kendi üzerime olmak üzere vekîl-i mezbûr Abdulvahhab Efendi ile muhâla‘a-i sahîha-i şer‘iyye ile muhâla‘a edip ol dahi minvâl-i muharrer üzere hul‘-ı mezbûru ba‘de’l-kabûl müvekkil-i mezbûr Hüseyin ile zevciyet beynimizde kāime iken işbu yedimde olan nafaka hücceti nâtıka olduğu üzere zevcim müvekkil-i mezbûr üzerine takdîr etdirdiğim beher yevm onar akçeden beş ayda müctemi‘ olan bin beş yüz akçeden ve sâir beynimizde cârî ahz u i‘tâ ve mu‘âmelât-ı şettâya müte‘allıka âmme-i da‘vâdan müvekkil-i mezbûr Hüseyin’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 14 min-Cumâdelûlâ sene 1116 Şuhûdü’l-hâl: Ahmed Çelebi b. Matlabcı, el-Hâc Abdurrahman el-muhzır, el-Hâc Ali b. Abdullah Çukadâr, Yusuf Çelebi b. Abdullah.