Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 377 Hüküm no: 369 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin Kapıcı Hasan Bey Vakfı’ndan borç alması (istiğlal) Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mehmed Efendi b. Ahmed irsâl olunup ol dahi mahmiye-i İstanbul’da Mesihpaşa mahâllesinde sâkin fahrü’l-müderrisîni’l-kirâm Hüseyin Efendi b. Mehmed’in sâkin olduğu menzile varup zeyl-i kitâbda muharrerü’l-esâmi Müslimîn huzûrunda akd-i meclis-i şer‘-i nebevî eyledikde mûmâ-ileyh Hüseyin Efendi meclis-i ma‘kūd-ı mezbûrda merhûm Kapıcı Hasan Bey Vakfı’nın nukūd-ı mevkūfesine bi’l-fi‘il mütevellî olan işbu râfi‘ü’l-vesîka diğer Hüseyin Bey b. Abdullah nâm kimesne mahzarında ikrâr-ı tam ve takrîr-i kelâm edip silk-i mülkümde münselik olup zikr olunan Mesihpaşa mahâllesinde vâki‘ bir tarafdan Papuç Emirzâde utekāsına meşrût olan menzil ve bir tarafdan Mesihpaşa odalarına ve bir tarafdan ba‘zan Sadık Çelebi menziline ve ba‘zan Gazzâz Mehmed Çelebi menziline ve taraf-ı râbii tarîk-i âm ile mahdûd fevkānî ve tahtânî büyût-ı adîde ve hadîka ve muhavvatayı müştemil mülk menzilimi cümle tevâbi‘ ve levâhıkı ile mütevellî-i mezbûra iki yüz elli guruşa bi-tarîkı’l-istiğlâl bey‘ ü teslîm ol dahi ber-vech-i muharrer mâl-ı vakf-ı mezbûr ile yedimden iştirâ ve kabûl eylediğinden sonra semeni olan meblağ-ı mezbûr iki yüz elli guruşu mütevellî-i mezbûr yedinden tamâmen ba‘de’l-ahz ve’l-kabz, mütevellî-i mezbûr menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan bir sene tamâmına değin yirmi beş guruşa bana icâr ve teslîm, ben dahi isticâr ve kabûl eyledim dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an ba‘s olunan Osman b. Süleyman ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Cumâdelûlâ sene sitte aşer ve mi’e ve elf. Şuhûdü’l-hâl: Osman Efendi imam-ı mahâlle, Hüseyin Halîfe b. Ahmed kayyûm, Hâfız Mehmed Çelebi b. ( ) Mustafa b. Hüseyin, Molla İsmail b. ( ) Ahmed Çelebi b. Mustafa, Molla Osman tâbi‘-i efendi.