Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 378 Hüküm no: 370 Orijinal metin no: [89a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin evini Ali Ağa’ya satması Bâ-imzâ-i hazret efendi Mahmiye-i İstanbul’da Karabaş mahâllesi ahâlîsinden Mustafa Çelebi b. Ahmed Mahmiye-i mezbûrede meclis-i şer‘de hâssa cerrâhlarından işbu râfi‘ü’l-vesîka Ali Ağa b. Mehmed mahzarında ikrâr-ı tam ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede mahâlle-i merkūmede vâki‘ etrâf-ı erba‘adan mahâlle-i mezbûre mescid-i şerîfi ve el-Hâc Mehmed ve Berber Hüseyin Çelebi ve Ahmed Çelebi mülkleri ve tarîk-i âm ve tarîk-i hâs ile mahdûd fevkānî üç bâb oda ve bir sofa ve bir kilâr ve matbâh ve bahçe ve bi’r-i mâ ve mahzen ve kenîfi müştemil mülk menzilimi âmme-i tevâbi‘ ve levâhıkı ile işbu mezbûr Ali Ağa’ya üç yüz altmış beş kıt‘a esedî guruşa tarafeynden îcâb ve kabûlü hâvî ve şurût-ı müfsideden ârî bey‘-i kat‘î ile bey‘ ve temlîk ve teslîm, ol dahi iştirâ ve temellük ve tesellüm ve kabûl etdikden sonra semen olan meblağ-ı mezbûr üç yüz altmış beş guruşu yedinden tamâmen ahz u kabz eyledim, fîmâ-ba‘d menzil-i mahdûd-ı mezbûr merkūm Ali Ağa’nın mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min-Cumâdelûlâ li-sene sitte aşere ve mi’e ve elf. Şuhûdü’l-hâl: Umdetü’l-ulemâi’l-izâm Nuh Efendi, Hasan b. Mehmed, Mehmed Efendi müezzin, Mehmed Efendi imam, Mustafa Çelebi b. Mehmed, Ahmed Beşe b. Ömer, Mehmed Bey b. Ali, Ahmed Bey b. Abdullah, es-Seyyid İbrahim Çelebi b. es-Seyyid Mustafa.