Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 379 Hüküm no: 371 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katledilen İsa’nın varisleri annesi Fatıma ile babası Ali’nin, Kara Ahmed Ağa aleyhindeki diyet davasında sulh olmaları Vilâyet-i Anadolu’da medîne-i Alaşehir mahâllâtından Karaağaç mahâllesi ahâlîsinden iken bundan akdem maktûlen vefât eden İsa b. Ali’nin verâseti vâlidesi Fâtıma bt. el-Hâc Mehmed nâm hatun ile babası Ali b. el-Hâc İsa nâm kimesneye münhasıra olduğu lede’ş-şer‘i’l-enver zâhir ve mütebeyyin oldukdan sonra mezbûr Ali kendi tarafından asâleten ve mezbûre Fâtıma tarafından husûs-ı âti’l-beyanı taleb ve da‘vâya ve lede’l-iktizâ sulh ve ibrâya vekîl olduğu zât-ı mezbûreyi ma‘rifet-i şer‘iyye ile ârifân medîne-i mezbûrede Şeyh mahâllesi sükkânından Ali b. Ahmed ve İsmail b. Ali nâm kimesneler şehâdetleriyle şer‘an sâbit olmağla vekâleten mahmiye-i İstanbul’da meclis-i şer‘de yine medîne-i mezbûre ahâlîsinden işbu bâ‘isü’l-vesîka Kara Ahmed Ağa b. Halil nâm kimesne tarafından zikri âtî husûsa vekîl olduğu Ahmed b. Abdullah ve Hasan b. Mahmud nâm kimesneler şehâdetleriyle şer‘an sâbit olan Ali b. Mehmed nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip müvekkil-i merkūm Kara Ahmed Ağa târîh-i kitâbdan dört ay mukaddem mahâlle-i mezbûrede Hasıllık nâm mevzi‘de vakt-i asırda oğlum mezbûr İsa’yı tüfenk ile sağ uyluğu üzerinde kasden vurup katleyledi deyü bundan akdem müvekkil-i mezbûr Kara Ahmed Ağa’dan mûceb-i şer‘îsini taleb ve da‘vâ eylediğimde ol dahi husûs-ı mezbûru bi’l-külliye münkir olup vech-i meşrûh üzere müdde‘âmı isbât sadedinde iken muslihûn tavassut edip da‘vâ-i mezkûremden benimle an-inkâr seksen bin akçe üzerine inşâ-yı akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr seksen bin akçeyi vekîl-i mezbûr yedinden asâlet ve vekâletim hasebiyle tamâmen ahz u kabz edip husûs-ı mezbûre müte‘allıka da‘vâdan müvekkile-i merkūm Kara Ahmed Ağa’nın zimmetini asâleten ve vekâleten ibrâ-i âm ile ibrâ ve iskāt eyledim, ba‘de’l-yevm oğlum maktûl-ı mezbûrun dem ü diyetine müte‘allıka müvekkile-i merkūm ile da‘vâ ve nizâ‘ım yokdur dedikde, gıbbe’t-tasdîk vekîl-i mezbûr Ali Ağa dahi yine meclis-i şer‘de katîl-i merkūm İsa’nın babası merkūm Ali mahzarında ikrâr ve takrîr-i kelâm edip Kara Ahmed Ağa’nın karındaşı Mehmed Ağa b. Halil nâm kimesnenin yirmi bin akçe kıymetli Seyfi nâmında bir kölesini târîh-i mezbûrda mezbûr İsa penyal ile kasden vurup katleyledi deyü ben dahi mûceb-i şer‘îsini merkūm Ali’den vekâletim hasebiyle taleb ve da‘vâ etmişdim. El-hâletü hâzihi da‘vâ-i mezkûremden merkūm Ali’nin zimmetini vekâleten ibrâ ve iskāt eyledim, ba‘de’l-yevm her birimizin âhar ile husûs-ı mezbûra müte‘allıka da‘vâ ve nizâ‘ımız kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-hâmis aşer min-Cumâdelûlâ sene sitte ve aşere ve mi’e ve elf. Şuhûdü’l-hâl: Ali Efendi b. Abdurrahman başyazıcı, Ebubekir Ağa ser-çavuşân, Ahmed Ağa b. Mehmed vekîlharç, Mustafa b. Abdülkadir, Mehmed b. Baki, Mustafa b. Mehmed, Ömer b. Osman, Hüseyin b. Mehmed, Ali odabaşı, İsmail b. Ali, Veli Beşe b. Ahmed